El ishi eleńdep kútip júrgen «Qazaq eli» teleserialy dál biyl ekranǵa jol tartpaq.
Búgin atalǵan jobanyń bas prodiýseri Arman Asenov myrza Abai.kz portalyna suhbat berip, atalǵan serialdyń naqty qai kúni jaryq kóretini týraly áńgimelep berdi.
- Areke, sizben suhbatty myna suraqtan bastasam dep otyrmyn. «Qazaq eli» serialyna QR Mádeniet jáne sport ministrligi tarapynan qazir qandai da bir qoldaý jasalyp jatyr ma osy?
-Suhbatymyzdy osy saýaldan bastaǵanyńyz jáne ony maǵan qoiǵanyńyz óte jón boldy. Sebebi men – osy jobanyń bas prodiýserimin. Máseleniń mán-jaiyn naqty bilemin. Negizinen jobany qoldap otyrǵan QR Mádeniet jáne sport ministrligi. Sondyqtan ministrliktegi azamattarǵa raqmet aitýymyz kerek.
-Bastapqyda qarjy jetpeidi dep, jurttan jylý jinaǵan edińizder. Qazir qarjylandyrý jaǵy qalai?
-Ondai kezder boldy, ras. Qazir qarjy bólindi. Jumys retimen júrip jatyr.
-Qansha bólindi jáne qaidan?
-Negizi eń basynda ministrlikten 1 milliard teńge bólingen. Ol qarjy óz ornymen jumsaldy. Keiin qarjylyq qiyndyqtar bolǵan soń, biz qosymsha qarjy suradyq. Ministrlik qosymsha taǵy aqsha bóldi.
-Almaty qalasy ákimshiligi de aralasyp, biraz qarjy tabylǵan edi ǵoi.
-Iá, Almaty qalasy ákimshiligi usynys jasap, «BazisA» kompaniiasy 180 million teńge bóldi. Odan bólek, «Freedom Finance
- Sonymen túsirilim jumystary aiaqtalǵany belgili. Ótken joly rejisser Rústem Ábdirashevpen sóileskenimizde, montajdaý jumystary júrip jatqanyn aityp edi...
-Ras, birinshi maýsymnyń túsirilimderi aiaqtaldy. Tipti, montajdaý jumystary da márege jetip qaldy. Buiyrsa biyl «Qazaq eli» serialy ekranǵa jol tartady dep josparlap otyrmyz. Al túsirilim jumystaryna keler bolsaq, ol aiaqtalǵan joq. Sebebi, biz jobanyń ekinshi maýsymyn shyǵarmaqpyz. Bul baǵytta Batysta kóptegen serialdar túsirilip jatyr ǵoi. Sol sekildi, «Qazaq eli» serialy jurtty tań qaldyryp, tamsandyratyn qazaq kinogerleriniń tuńǵysh týyndysy bolady dep oilaimyz.
-Demek, bul batystyq formattaǵy ekshn-serial bolmaq qoi... Mysaly, «Taqtar oiyny»...
-Iá, dál solai. Bizdiń elde bul janrda, bul formatta serial túsirilgen joq. Batysta, Batysty qoiyp dúniejúzinde suranysqa ie bolyp otyrǵan «Taqtar oiyny» formatynda daiyndaldy. Eger «Taqtar oiyny» serialynda kóp epizodtar kompiýterlik grafikamen daiyndalsa, bizde bári tabiǵi bolady. «Taqtar oiyny» serialynda fantastika basym, keiipkerler oidan shyǵarylǵan. Al bizdiń serialda bári shyn keiipkerler. Ómirde bolǵan, oqiǵalar da tarihi derekter boiynsha túzilgen. Aita keteiin, bizde buryn-sońdy mundai serialdar bolǵan joq. Sondyqtan biz barymyzdy saldyq.
-«Taqtar oiynyna» álemdik deńgeide suranys joǵary. Al bizdiń «Qazaq eli» serialy álemdik prokatta básekelese ala ma?
-Bilesiz be? Bizge kóptegen sheteldik telearnalar habarlasyp jatyr. Mysaly, berisi Resei men Ýkraina bizdiń serialdy satyp alýǵa usynys jasap úlgerdi. Máselenki, qazir ORT arnasymen kelissózder júrgizilýde. Arysy Batystyń telearnalary habarlasyp, serialdyń qashan daiyn bolatynyn surap otyr. «NBC» bastaǵan Batys elderi arnalary kóptep habarlasýda. «Ál jazira» arnasy da bizdiń serialdy satyp alýǵa kelisti. Sebebi, Batys prokatyndaǵy serialdardyń kópshiligi kompiýterlik grafikamen túsiriledi. Al bizde shynaiy keiipkerler, shynaiy tabiǵat aiasy. Jasyl fondy qoldanbadyq. Sondyqtan «Qazaq eli» serialynyń sapasy da, áseri de erekshe bolmaq.
- Film byltyr, Qazaq handyǵynyń 550 jyldyǵy aiasynda kórsetilýi kerek edi. Bizge belgili, belgisiz sebeptermen keshigip, áne-mine dep júrip, biyl ǵana ázir bolǵan siiaqty. Nege?
-Ras aitasyz, serialymyz belgili sebeptermen keshigip qaldy. Degenmen biylǵy jyl da qazaq halqy úshin aitýly datalarmen sáikes keledi. Táýelsizdigimizdiń 25 jyldyǵyn atap ótkeli otyrmyz. Jeltoqsan kóterilisine de 30 jyl toldy.
-Sonymen serialdy qashan kóremiz?
-Biylǵy jyldyń 16-jeltoqsanynda «Qazaq eli» serialynyń kino nusqasy kórermenge jol tartady. Alǵashqy kórsetilimi Astana qalasynda «Qazaqstan» kontsert zalynda, Almaty qalasynda «Respýblika» saraiynda ótkiziledi. Al 17 jeltoqsan kúni elimizdiń barlyq kinoteatrlarynda «Qazaq eli» serialynyń kinonusqasy shyǵady. Kino nusqanyń uzaqtyǵy 2 saǵat. Serialdy kórgen adamnyń ókinbeitinine bek senimdimin.
-Al serial she?
-Kez kelgen serialdy túsirgen soń, aldymen onyń kino nusqasy kórsetilimge shyǵarylady. Biz de solai istedik. Al serialǵa keler bolsaq, jeltoqsan aiynda, jańa jylǵa qarsy eki aptalyq demalys bolady. Dál sol kezde biz serialdy kórsetpekpiz.
-Qansha serial túsirildi?
-«Qazaq eli» serialynyń alǵashqy maýsymyna 10 serial ázir. Ár serialdyń uzaqtyǵy 40-45 minýttan turady.
-Alǵashqyda kóp serialy degen edi... Daiyn bolǵany 10 bólim eken. Osy 10 bólimdi eki jyl túsirdińizder me?
-Negizi qazir biz «Qazaq eliniń» ekinshi maýsymyn daiyndap jatyrmyz. Alǵashqyda «Máńgilik el» baǵdarlamasy aiasynda 100 bólim dep josparlanǵan bolatyn. Belgili sebeptermen túsirilim jumystary keshikti. Sondyqtan biz alǵashqy maýsymdy 10 seriiamen bastaimyz. Sosyn ekinshi maýsym, úshinshi maýsym bolyp jalǵasa beredi.
-Jaqsy, Areke, iske sát!
-Sizderge de raqmet!
Suhbattasqan - Nurgeldi Ábdiǵaniuly
Abai.kz
