Qytaida turatyn etnikalyq qazaq Muhtar Tileýǵazy. Sýret onyń jeke arhivinen alyndy.
Qytaida týyp-ósken etnikalyq qazaq Muhtar Tileýǵazy ondaǵan tarihi filmde oinaǵan. Ol somdaǵan rólderdiń arasynda túrkitektes keiipkerler de bar.
Qytaida akter Muhtar Tileýǵazy basty rólderdiń birin oinaǵan «Jaýjúrek aspan sardary» filmi prokatqa shyqqan kúni-aq 19 million dollar qarjy jinaǵany habarlandy. Bul film – 40 jastaǵy qazaq akter túsken 20 shaqty týyndynyń biri. Muhtar Tileýǵazy Azattyqqa bergen suhbatynda bul filmdegi róli jaily, kino ónerine qalai kelgeni týraly áńgimeledi.
Azattyq: – Akterlik negizgi mamandyǵyńyz ba?
Muhtar Tileýǵazy: – Balalyq shaǵym ótken Ile oblysy Kúnes aýdanyndaǵy orta mektepti bitirgennen keiin Beijińge (Pekinge – red.) kelip, Qytai ónerkásip ýniversitetiniń ekonomika fakýltetinde tórt jyl bilim aldym. Biraq mamandyǵym boiynsha bir kún de jumys istemeppin. Óitkeni bala jasymnan kinoǵa túsýge qumar boldym. Orta mektepte sportpen, onyń ishinde basketbolmen ainalystym. Boiym – 1 metr 87 santimetr. Meniń kinoǵa kelýime de osy boiym áser etti desem bolady.
Azattyq: – Kino salasyna qalai keldińiz?
Qytaida turatyn akter Muhtar Tileýǵazy.
Muhtar Tileýǵazy: – 2010 jyly Qytaidyń tanymal rejisserleriniń biri Lý Chjan meni filmine shaqyryp, sonda oinadym. Sol filmnen keiin kino salasyndaǵy jolym ashyldy. Sodan soń ile-shala belgili kino maman Tian Chjýan Chjýannyń kózine tústim. Ol filminde Tań patshalyǵyna qarsy shyqqan túrkitektes jaýyngerdiń rólin berdi. Mine, osydan keiin tek tarihi filmderge túsip kelemin. Sol tarihi filmdegi negizgi keiipkerlerdiń róli maǵan buiyryp keledi. Tipti, birde qytaidyń tanymal rejisserleriniń biri «seniń túriń burynǵynyń adamdaryna keledi» degen. Beijińde qazaqtardy kórmegen rejisserler de kezdesedi. Keide «Sen qai ultsyń?» dep surap jatady. Ondai kezde «Qazaq degen ulttan bolamyn. Qazaqstan degen eldi estip pe edińiz? Qazaq degen halyq negizinde sol jaqta turady» dep túsindiremin.
Azattyq: – Osy ýaqytqa deiin qansha filmge tústińiz.
Muhtar Tileýǵazy: – Naqty sanyn aita almaimyn. Shamamen 20-ǵa jýyqtap qaldy. Qazir men túsken filmderdiń biri «Jaýjúrek aspan sardary» kinosyn kórsetip jatyr. Bul filmdi 2014 jyly túsirgen. Qazir tek Qytaida ǵana emes, álemniń 30-ǵa jýyq elinde kórsetilip jatyr dep estidim. Bul filmde Bairuń taipasy ókiliniń rólin somdadym. Al 2016 jyly tórt filmge tústim, biraq olardy áli jaryqqa shyǵarǵan joq.
Azattyq: – Kinoǵa túsýden bos kezde nemen ainalysasyz?
Muhtar Tileýǵazy: – Kelinshegim Anar ózim týyp-ósken aýmaqta úkimettik qyzmette isteidi. Sol sebepti kino túsiriliminen bos ýaqyttary týǵan jerimde bolamyn. Qolym bos kezderi kitap oqimyn, sportpen shuǵyldanyp, denemniń bulshyq etterin jetildiremin, at ústinde júrip túrli óner jasaýǵa jattyǵamyn. Sebebi kinodaǵy negizgi keiipkerlerim at ústinde bolady. Al kino túsirý kezinde bala-shaǵamdy alyp, Beijińge kóship baramyn. Kóshpeli qazaqpyn desem de bolady.
Azattyq: – Suhbatyńyzǵa rahmet.
Nurtai Lahanuly, "Azattyq"
