Kókshetaýda jumysshy biikten qulap, aýyr jaraqat aldy. Oqiǵaǵa qatysty qylmystyq is qozǵalǵan. Al eńbek inspektsiiasyna jumys berýshiden jazataiym oqiǵa týraly habarlama túspegen, dep habarlaidy ult.kz.
Nayza_kokshe Instagram paraqshasynyń málimetinshe, oqiǵa Vasilkovskii shaǵyn aýdanynda bolǵan. Jazba avtory jumysshynyń keminde 5 metr biiktikten qulaǵanyn habarlaǵan. Jariialanymda onyń basynan, omyrtqasy men basqa da súiekterinen jaraqat alǵany aitylǵan.
Qalalyq politsiia oqiǵa boiynsha qylmystyq is qozǵalǵanyn rastady. Qazir bolǵan jaǵdaidyń mán-jaiy anyqtalyp jatyr.
Aqmola oblysynyń memlekettik eńbek inspektsiiasy departamentiniń habarlaýynsha, jumys berýshi jazataiym oqiǵa týraly vedomstvoǵa habarlamaǵan.
Qoldanystaǵy talaptarǵa sáikes, jumys berýshige jazataiym oqiǵa týraly habarlamaǵany úshin ákimshilik jaýapkershilik qarastyrylǵan. Qazir inspektsiia oqiǵanyń mán-jaiyn anyqtap jatyr.
