Qazaqstandyq boksshy Sáken Bibosynov jattyǵý kezinde aýyr jaraqat alyp, aýrýhanaǵa jetkizildi. Bul týraly sport jýrnalisi Aslan Qajenov málimdedi, dep habarlaidy ult.kz.

Jýrnalistiń málimetinshe, sportshynyń omyrtqasyna zaqym kelgen. Osyǵan bailanysty ol 29 qazanda Tarazda bastalatyn bokstan Qazaqstan chempionatyna qatysa almaidy.

“Ókinishke qarai, keshe jattyǵý barysynda aýyr jaraqat alyp, aýrýhanaǵa tústi. Omyrtqasyna zaqym keldi. Tezirek saýyǵyp ketýin tileimiz”, – dep jazdy Qajenov.

Jýrnalist el birinshiligine qatyspaityn ózge boksshylardy da atady. Onyń aitýynsha, Aziia oiyndarynda júlde alǵan Mahmud Sabyrhan, Tórehan Sabyrhan jáne Aibek Oralbai bul týrnirge qatyspaidy. Al Nurbek Oralbai aldyńǵy kezdesýinde alǵan jaraqatyna bailanysty úzilis jasaǵan.
Áielder quramasynan Alýa men Natalia da sharshy alańǵa shyqpaidy.

Aita keteiik, Sport jýrnalisi Gennadii Golovkinmen keleńsiz jaǵdaiǵa tap bolǵan. 

Sáken Bibosynov kim?

Sáken Bibosynov – qazaqstandyq boksshy, eki dúrkin álem chempiony jáne Tokio Olimpiadasynyń qola júldegeri. Ol 2019 jyly álem chempionatynda qola medal jeńip alǵan. 2021 jyly Tokioda ótken Olimpiada oiyndarynda 52 kelige deiingi salmaqta úzdik úshtikke endi.

Sol jyly Serbiianyń Belgrad qalasynda ótken álem chempionatynda altyn medal ielendi. Al Dýbaida IBA uiymdastyrǵan álem birinshiliginde 54 keli salmaqta jeńiske jetip, eki dúrkin álem chempiony atandy. Finalda reseilik Viacheslav Rogozindi utty. 

Sáken Bibosynov 2024 jylǵy Parij Olimpiadasyna da joldama alyp, Qazaqstan atynan 51 kelige deiingi salmaqta óner kórsetti.