قىتايدا تۇراتىن ەتنيكالىق قازاق مۇحتار تٸلەۋعازى. سۋرەت ونىڭ جەكە ارحيۆٸنەن الىندى.
قىتايدا تۋىپ-ٶسكەن ەتنيكالىق قازاق مۇحتار تٸلەۋعازى ونداعان تاريحي فيلمدە ويناعان. ول سومداعان رٶلدەردٸڭ اراسىندا تٷركٸتەكتەس كەيٸپكەرلەر دە بار.
قىتايدا اكتەر مۇحتار تٸلەۋعازى باستى رٶلدەردٸڭ بٸرٸن ويناعان «جاۋجٷرەك اسپان ساردارى» فيلمٸ پروكاتقا شىققان كٷنٸ-اق 19 ميلليون دوللار قارجى جيناعانى حابارلاندى. بۇل فيلم – 40 جاستاعى قازاق اكتەر تٷسكەن 20 شاقتى تۋىندىنىڭ بٸرٸ. مۇحتار تٸلەۋعازى ازاتتىققا بەرگەن سۇحباتىندا بۇل فيلمدەگٸ رٶلٸ جايلى, كينو ٶنەرٸنە قالاي كەلگەنٸ تۋرالى ەڭگٸمەلەدٸ.
ازاتتىق: – اكتەرلٸك نەگٸزگٸ ماماندىعىڭىز با?
مۇحتار تٸلەۋعازى: – بالالىق شاعىم ٶتكەن ٸلە وبلىسى كٷنەس اۋدانىنداعى ورتا مەكتەپتٸ بٸتٸرگەننەن كەيٸن بەيجٸڭگە (پەكينگە – رەد.) كەلٸپ, قىتاي ٶنەركەسٸپ ۋنيۆەرسيتەتٸنٸڭ ەكونوميكا فاكۋلتەتٸندە تٶرت جىل بٸلٸم الدىم. بٸراق ماماندىعىم بويىنشا بٸر كٷن دە جۇمىس ٸستەمەپپٸن. ٶيتكەنٸ بالا جاسىمنان كينوعا تٷسۋگە قۇمار بولدىم. ورتا مەكتەپتە سپورتپەن, ونىڭ ٸشٸندە باسكەتبولمەن اينالىستىم. بويىم – 1 مەتر 87 سانتيمەتر. مەنٸڭ كينوعا كەلۋٸمە دە وسى بويىم ەسەر ەتتٸ دەسەم بولادى.
ازاتتىق: – كينو سالاسىنا قالاي كەلدٸڭٸز?
قىتايدا تۇراتىن اكتەر مۇحتار تٸلەۋعازى.
مۇحتار تٸلەۋعازى: – 2010 جىلى قىتايدىڭ تانىمال رەجيسسەرلەرٸنٸڭ بٸرٸ لۋ چجان مەنٸ فيلمٸنە شاقىرىپ, سوندا وينادىم. سول فيلمنەن كەيٸن كينو سالاسىنداعى جولىم اشىلدى. سودان سوڭ ٸلە-شالا بەلگٸلٸ كينو مامان تيان چجۋان چجۋاننىڭ كٶزٸنە تٷستٸم. ول فيلمٸندە تاڭ پاتشالىعىنا قارسى شىققان تٷركٸتەكتەس جاۋىنگەردٸڭ رٶلٸن بەردٸ. مٸنە, وسىدان كەيٸن تەك تاريحي فيلمدەرگە تٷسٸپ كەلەمٸن. سول تاريحي فيلمدەگٸ نەگٸزگٸ كەيٸپكەرلەردٸڭ رٶلٸ ماعان بۇيىرىپ كەلەدٸ. تٸپتٸ, بٸردە قىتايدىڭ تانىمال رەجيسسەرلەرٸنٸڭ بٸرٸ «سەنٸڭ تٷرٸڭ بۇرىنعىنىڭ ادامدارىنا كەلەدٸ» دەگەن. بەيجٸڭدە قازاقتاردى كٶرمەگەن رەجيسسەرلەر دە كەزدەسەدٸ. كەيدە «سەن قاي ۇلتسىڭ?» دەپ سۇراپ جاتادى. ونداي كەزدە «قازاق دەگەن ۇلتتان بولامىن. قازاقستان دەگەن ەلدٸ ەستٸپ پە ەدٸڭٸز? قازاق دەگەن حالىق نەگٸزٸندە سول جاقتا تۇرادى» دەپ تٷسٸندٸرەمٸن.
ازاتتىق: – وسى ۋاقىتقا دەيٸن قانشا فيلمگە تٷستٸڭٸز.
مۇحتار تٸلەۋعازى: – ناقتى سانىن ايتا المايمىن. شامامەن 20-عا جۋىقتاپ قالدى. قازٸر مەن تٷسكەن فيلمدەردٸڭ بٸرٸ «جاۋجٷرەك اسپان ساردارى» كينوسىن كٶرسەتٸپ جاتىر. بۇل فيلمدٸ 2014 جىلى تٷسٸرگەن. قازٸر تەك قىتايدا عانا ەمەس, ەلەمنٸڭ 30-عا جۋىق ەلٸندە كٶرسەتٸلٸپ جاتىر دەپ ەستٸدٸم. بۇل فيلمدە بايرۇڭ تايپاسى ٶكٸلٸنٸڭ رٶلٸن سومدادىم. ال 2016 جىلى تٶرت فيلمگە تٷستٸم, بٸراق ولاردى ەلٸ جارىققا شىعارعان جوق.
ازاتتىق: – كينوعا تٷسۋدەن بوس كەزدە نەمەن اينالىساسىز?
مۇحتار تٸلەۋعازى: – كەلٸنشەگٸم انار ٶزٸم تۋىپ-ٶسكەن اۋماقتا ٷكٸمەتتٸك قىزمەتتە ٸستەيدٸ. سول سەبەپتٸ كينو تٷسٸرٸلٸمٸنەن بوس ۋاقىتتارى تۋعان جەرٸمدە بولامىن. قولىم بوس كەزدەرٸ كٸتاپ وقيمىن, سپورتپەن شۇعىلدانىپ, دەنەمنٸڭ بۇلشىق ەتتەرٸن جەتٸلدٸرەمٸن, ات ٷستٸندە جٷرٸپ تٷرلٸ ٶنەر جاساۋعا جاتتىعامىن. سەبەبٸ كينوداعى نەگٸزگٸ كەيٸپكەرلەرٸم ات ٷستٸندە بولادى. ال كينو تٷسٸرۋ كەزٸندە بالا-شاعامدى الىپ, بەيجٸڭگە كٶشٸپ بارامىن. كٶشپەلٸ قازاقپىن دەسەم دە بولادى.
ازاتتىق: – سۇحباتىڭىزعا راحمەت.
نۇرتاي لاحانۇلى, "ازاتتىق"
