Janar Aijanova "Aitarym bar" podkastynda bala kezindegi tárbiesin eske alyp, qazaq otbasyndaǵy syilastyq pen týystyq qarym-qatynas týraly sóz qozǵady, dep habarlaidy ult.kz.
Suhbat barysynda ánshi qazaq otbasynda jezde men baldyz arasyndaǵy qarym-qatynastyń da ózindik ádebi bolǵanyn aitty. Onyń sózinshe, ózderi ósken ortada týǵan jezdemen qaljyńdasýǵa ruqsat etilmegen.
"Bizdi týǵan jezdemizben qaljyńdastyrmaityn. Tek alys týys bolyp keletin jezdelermen qaljyńdasýǵa bolatyn. Al týǵan jezdemen eshqashan oinaýǵa bolmaidy degen tyiymmen óstik. Bul da syilastyqtyń bir túri", – dedi Janar Aijanova.
Óner iesi burynǵy otbasylyq tárbiede kelinge qamqorlyq jasaýǵa da erekshe kóńil bólingenin jetkizdi. Ásirese, jańa túsken kelin men bosanǵan áieldi aýyr jumystan bosatyp, olarǵa jan-jaqty kómek kórsetilgenin eske aldy.
"Kezinde jeńgelerimizge de kómektesetinbiz. Úige endi kelin bolyp túskende nemese bosanyp kelgende sheshemiz olarǵa bir shelek sýdy da tóktirmeitin. Bul kúieý balaǵa da qatysty. Sol sebepti týǵan jezdemen oinamaidy degen tárbie bolǵan", – dep túsindirdi ánshi.
Janar Aijanovanyń pikirinshe, osyndai tárbieniń negizinde adamdardyń bir-birine degen qurmeti men janashyrlyǵy jatyr. Ol otbasyndaǵy tatýlyqty saqtaý úshin tek kelinniń úlkendi syilaýy jetkiliksiz ekenin, syilastyq eki jaqtan da bolýy kerektigin atap ótti.
"Osyndai syilastyq bar jerde kelin enege qalai renjidi? Búginde sol syilastyqtyń arqasynda bir-birimizben qýanyp ta, jylap ta qaýyshamyz. Úlkenge de, kishige de aitarym – arada syilastyq bolý kerek", – dedi óner iesi.
Ánshi ýaqyttyń zymyrap ótetinin de eske salyp, adam ómirindegi eń mańyzdy qundylyqtardyń biri jaqyndarymen jaqsy qarym-qatynas ornatý ekenin aitty.
"Kárilik qýyp jetti, tos demedi, jastyq shaq óte shyqty, qosh demedi deidi ǵoi. Syilastyq bar jerde bereke bar. Ol eki jaqtan da bolýy kerek", – dep túiindedi Janar Aijanova.
Óner iesiniń bul pikiri qazaqy tárbiedegi úlkenge qurmet, kishige izet kórsetý dástúriniń mańyzyn taǵy bir márte eske saldy. Onyń aitýynsha, otbasyndaǵy bereke bir adamnyń ǵana mindeti emes, árbir jannyń ózara túsinistigi men qurmetine bailanysty.
Janar Aijanova kim?
Janar Aijanova – qazaqstandyq ánshi, aktrisa jáne telejúrgizýshi, qazaq ónerinde ózindik orny bar tanymal tulǵa. Ol kópshilikke mýzykalyq shyǵarmashylyǵymen, ázil-syqaq janryndaǵy rólderimen jáne televiziialyq jobalarǵa qatysýymen belgili.
Janar Aijanova 1968 jyly Aqtóbe oblysy Shalqar aýdanynyń Tumalykól aýylynda dúniege kelgen. Bala kezinen án men dombyraǵa qyzyǵyp, mekteptegi mádeni sharalarǵa belsendi qatysqan. 1985-1986 jyldary Shalqar aýdandyq mádeniet úiinde avtoklýb meńgerýshisi bolyp eńbek etken. 1995 jyly Abai atyndaǵy Qazaq ulttyq pedagogikalyq ýniversitetiniń mýzyka fakýltetin támamdaǵan. 1991-2000 jyldary Súiinbai atyndaǵy Almaty oblystyq filarmoniiasynda qyzmet atqarǵan. Osy kezeńde "Adyrna" folklorlyq-etnografiialyq ansambliniń quramynda óner kórsetken. Keiin "Gúlder" ansamblinde ánshilik qyzmetin jalǵastyrǵan. Onyń shyǵarmashylyǵynda ulttyq mýzyka men dástúrli án óneri mańyzdy oryn alady. Óner iesi "Men qazaq qyzdaryna qairan qalam", "Dostarym", "Qobyzym" sekildi ánderdi oryndaýymen tanymal.
Janar Aijanova ánshilikten bólek, telejúrgizýshilik jáne akterlik qyrynan da tanylǵan. Ol KTK jáne basqa da telearnalardaǵy baǵdarlamalardy júrgizgen. Sonymen qatar "Otbasy", "Taqiialy perishte" teleserialdary men "Q-eli" ázil-syqaq jobasyna qatysqan.
2015 jyly Qazaq handyǵynyń 550 jyldyǵyna arnalǵan "Tarihy tasqa jazylǵan" atty kontsertin ótkizgen. Sol jyly "Dara jol" baǵdarlamasynda shyǵarmashylyq joly týraly áńgimelegen. Ánshi Qazaqstan Jastar odaǵy syilyǵynyń laýreaty jáne Qazaqstan Respýblikasynyń mádeniet qairatkeri atanǵan. 2020 jyly oǵan "Qazaqstannyń eńbek sińirgen qairatkeri" qurmetti ataǵy berilgen.
Búginde Janar Aijanova túrli suhbattar men televiziialyq baǵdarlamalarǵa qatysyp, óner jáne qoǵam taqyryptarynda pikir bildirip júr.
