Keshe otandyq arnalardyń birinde jýrnalist-jazýshy Sáken Sybanbaidyń «Ǵalamtordaǵy mahabbat» kitaby taldandy. Júsipbek Qorǵasbek júrgizgen habarda jazýshynyń erekshe kitabyn belgili jýrnalist-qalamgerler Qali Sársenbai men Dáýren Qýat taldaýǵa qatysty, – dep habarlaidy «Ult aqparat».
Biyl elýdi eńsergen jazýshy Sáken Sybanbai buǵan deiin nege jazbai júrgenin, kitap shyǵarýǵa nege asyqpaǵanyn aityp berdi.
«Men jýrnalistika mamandyǵyn tańdap keldim. Ózim tańdaǵan mamandyqtyń qyr-syryn bilýge tyrystym. «Merzimdi baspasóz» kafedrasynda boldym, ózimdi o bastan «gazetshi» dep sanadym. Tek gazet-jýrnalda ǵana istep júrdim. Múlde kórkem proza jazý, kitap jazý degen oi bolǵan joq. Bar oiym jýrnalistikada boldy. Maǵan nege jazbaisyń degen aǵalarym boldy. Biraq soǵan asa mán bermeppin. Sonyń biri - Marat Qabanbai aǵam edi, ol «Ana tili» gazetinde maǵan ustaz boldy. Bir jaǵy jaspyz, basqa da qyzyqtarǵa alańdap turamyz. Sol kezde ol kisi maǵan jazý týraly biraz áńgime aitty. Tiliń bar, ikemiń bar, jazýyń kerek degen siiaqty. Biraq meniń selsoq tyńdap otyrǵanymdy baiqady da, «ái, seniń ishińe áli sóz túspegen eken. Bara ber» dedi. Sol sóz keiin ishke tústi-aý deimin. Áitpese men jaqsy oqyrman boldym, qazaq ádebietiniń árbir ókilin oqyp óstik. Biraq jazýǵa sol keiingi 5-6 jylda ǵana keldim», – deidi Sáken Sybanbai.
Aita keteiik, «Ǵalamtordaǵy mahabbat» kitaby 13 áńgime, 2 hikaiattan turady. Jazýshy úshin ádebietke kelý, prozaǵa aralasý degen sheshim - aiaqasty bolǵan is emes. Ishki daiyndyqpen kelgen sheber jazýshy. Onyń birden-bir dáleli - osy atalǵan kitapqa engen «Muńlyq» áńgimesi.
«Muńlyq» degen birinshi áńgimemde jańa týǵan sharanany ájethanaǵa tastaý kóp oryn alyp, dattap ta, qaralap ta túrli aqparattar jazdyq. Biraq biz olardyń ishki jan dúniesin túsindik pa? Taqyrypqa osy turǵydan keldim. «Muńlyq», «Sen qandai tátti ediń, ómir», «Baqytty adam», «Senim», «Besinshi palata», «Ómir ótip barady», «Keremet kún», munyń barlyǵy birin biri tolyqtyryp otyrǵan áńgimeler. Búgingi kúnniń muńy, búgingi kúnniń zary, búgingi kúnniń bizdiń janymyzdy jep, júregimizdi aýyrtyp júrgen máseleler», – deidi jazýshy Sáken Sybanbai.
Talqylaýǵa qatysqan qalamger Qali Sársenbai jazýshynyń sheberligi men erekshelikterin atap kórsetti. Onyń aitýynsha, jazýshynyń sheberligi sondai ár oqiǵaǵa oqyrmannyń ózi ilesip otyrady.
«Sáken keiipkerin sýrettep jatpaidy. Onyń dialogtarynan-aq keiipkerdiń minezi kórinedi. Onyń taǵy bir myqtylyǵy iýmory bar. «Ramazan men Juldyzai» degen hikaiat maǵan qatty unady. Onyń ishinde monolog bar. Adamnyń jyrtqyshtyǵyn maqtanyń kósegine teńep ashady. Sheberlik qoi, rasynda. Sákenniń bir sheberligi - adamdy yntyqtyryp qoiady. Oqiǵanyń aiaǵyna deiin yntyǵyp, bir oqiǵadan ekinshi oqiǵaǵa aýysyp otyrasyz», – deidi Qali Sársenbai.
Al osy kitappen attas «Ǵalamtordaǵy mahabbat» degen áńgimesi bir bólek. Bul týraly jazýshy Dáýren Qýat taldap kórsetti.
«Basqa áńgimelerdegi keiipkerler bizge tanys beineler. Mysaly, «Bir sháýgim shái» etnografiialyq áńgime, «Ramazan men Juldyzai» qosyla almai ketken ǵashyqtar, «Mádenietti kisi», «Baqytty adam», bári-bári tanys. Bizge eń beitanys adam «Ǵalamtordaǵy mahabbat» áńgimesindegi keiipker. Eń keremet jazýshy óziniń shyǵarmasyna jańa keiipker alyp keledi. Obraz alyp keledi. Biz ózimizge tanys adamdar týraly osy ýaqytqa deiin jazyp keldik. Al qazirgi zamanda, onlain otyratyn, virtýaldy álem deimiz ǵoi, áleýmettik jelide otyratyn tipter paida boldy qazir. «Ǵalamtordaǵy mahabbattaǵy» negizgi keiipker osy. Barlyq dúnieden alystaǵan, ońashalanyp qalǵan, óz qiialynda álem jasap alǵan. Sol qiialynda ol myqty jigit, sulý qyz. Biraq ol kemis adam. Kompiýterdiń aldynda otyryp, sonshalyqty búkireiip qalǵan, bir qolynan bir qoly uzyn, osydai jańa keiipkerler kele jatyr. Osyndai keiipkerdi qazaq ádebietine birinshi alyp kelgen osy Sáken Sybanbai», – dedi Dáýren Qýat.
Esterińizge sala keteiik, keshe otandyq arnalardyń birinde jýrnalist-jazýshy Sáken Sybanbaidyń «Ǵalamtordaǵy mahabbat» kitaby taldandy. Júsipbek Qorǵasbek júrgizgen habarda jazýshynyń erekshe kitabyna belgili jýrnalist-qalamgerler Qali Sársenbai men Dáýren Qýat taldaýǵa qatysty. «Ǵalamtordaǵy mahabbat» kitaby 13 áńgime, 2 hikaiattan turady.
