"QazAgroQarjy" AQ ortalyq apparatynyń keńsesinde top-menedjerler tóbelesken, olardyń osy áreketi beinebaqylaý kameralaryna túsip qalǵan, - dep habarlaidy "Ult aqparat" kaz.tengrinews.kz portalyna silteme jasap.
Videony bergen derekkózdiń málimetinshe, jandaldasqan ekeýdiń biri Basqarma basshysynyń orynbasary Qanat Tursynqulov ta, ekinshisi departament direktory Erbol Táshenov. Videonyń kadrlarynan ekeýiniń eregeskeni jáne sondaǵy turǵan adamdardyń olardy ajyratyp jatqanyn baiqaýǵa bolady. "Janjal jańajyldyq otyrystyń aldynda bolǵan, - dedi kýágerler.
Kýágerlerdiń aitýynsha, kompaniianyń top-menedjerleri "QazAgroQarjy" AQ ortalyq apparatynyń keńsesinde (besinshi qabatta, top-menedjment bólmesinde) spirttik ishimdikter iship otyrǵan. Bul Táýelsizdik Kúni qarsańynda bolǵan. Merekelik toilaý jáne spirttik ishimdikter ishken qaita ońaltý departamentiniń direktory Erbol Táshenov basqarma basshysynyń orynbasary Qanat Tursynqulovty urǵan. Osy kezde tóbeles bastalǵan. Tóbeles barlyq qyzmetkerlerdiń kózinshe bolǵan jáne qyzmetkerler janjaldasqan ekeýin ajyratqan.
"QazAgroQarjy" AQ ókilderi osy jaǵdaidy kishigirim kelispeýshilik dep baǵalap, muny bir úlken daý nemese janjal deýge bolmaitynyn aitty.
"Bul jái kishigirim kelispeýshilik qana, qyzmettik babyna esh qatysy joq. Sonymen qatar, bul oqiǵa jumys ýaqyty aiaqtalǵannan keiin (21.00-de) bolǵan. Meditsinalyq kómekke júginýdiń nemese quqyq qorǵaý organdaryna habarlasýdyń esh qajeti bolmaǵan. Qazirgi ýaqytta ekeýiniń arasynda eshqandai arazdyq joq", - delingen resmi saýalǵa kelgen jaýapta.
"QazAgroQarjy" AQ ádep kodeksi boiynsha ekeýine de tártiptik sharalar qoldanylatyn bolypty.
"QazAgroQarjy" AQ "Aýyl sharýashylyǵynyń keibir máseleleri týraly" Qazaqstan Respýblikasy Úkimetiniń 1999 jylǵy 24 qarashadaǵy № 1777 qaýlysyna sáikes 1999 jyly 28 jeltoqsanda aýyl sharýashylyǵyndaǵy basty máselelerdiń biri - tehnika parkin jańartý máselesin sheshýde kómek kórsetý maqsatynda qurylǵan.
Qoǵam "QazAgro" Ulttyq basqarýshy holding quramyna enedi.
