QR Parlamenti Májilisiniń tóraǵasy Nurlan Nyǵmatýlin «QazAgro» holdingindegi shyǵyndarǵa qatysty pikir bildirdi, dep habarlaidy "Ult aqparat".
"Men ministrmen (aýyl sharýashylyǵy ministri Saparhan Omarov – "Ult aqparat") kelispeimin. Bári jaqsy, bári keremet deidi. Biraq negizgi problema mynada, "QazAgronyń" kreditteri qaitarylmai jatyr. Ońdy-soldy berip qoidy da, endi qaitara almai otyr", - deidi Nyǵmatýlin.
Osy oraida Májilis tóraǵasy holdingke biýdjetten qyrýar qarajattyń bólinetinin erekshe atap ótti. Sebebi QazAgro aýyl sharýashylyǵy salasyndaǵy qarajattyń negizgi operatory bolyp sanalady. Holding arqyly mańyzdy jobalar qolǵa alynady.
"Mysaly, sońǵy bes jyldyń ishinde kompaniianyń jarǵylyq kapitalyna 500 milllird teńgeden astam qarjy quiyldy. Al ótken jyldyń qorytyndysy boiynsha holdingtiń shyǵyny 400 milliard teńgeni qurady. Sonda kompaniia tabysty emes, shyǵyndy jinap otyr ǵoi. Bul jumbaq bir qurylym, "Bermýd úshtaǵany" siiaqty. Aqsha kiredi de, izim-ǵaiym joq bolyp ketedi. Endi, taǵy 60 milliard surap otyrsyzdar", - dedi Nyǵmatýlin.
Osydan keiin spiker kredit retinde berilgen milliardtaǵan qarjyny qaitarý máselesine basa nazar aýdardy. Sebebi ázirshe eshqandai nátije joq. Al ol aqshany taratý júiesi syn kótermeidi.
"Zań jaǵynan ne kerek? Biz óz tarapymyzdan bárin jasaimyz, kómek beremiz. Sharýalar da óz narazylyqtaryn bildirip jatyr. Holding iri kompaniialarǵa ǵana aqsha berip otyrady. Artynan sol eki-úsh kompaniia " Allahý ákbar" bolyp ketedi, ózderi de, aqsha da joq", - dep atap kórsetti Nyǵmatýlin.
Al "QazAgronyń" basshysy Erbol Qarashókeev problemanyń bar ekenin moiyndady, biraz qarjy qaitarylmai jatyr. Búginde arnaiy jospar bar. Sol boiynsha problemalyq jobalardyń máselesin sheshý qarastyrylǵan.
"Holdingtiń ózinde transformatsiia baǵdarlamasy bar. Biz QazAgrony shaǵyn quramda jasaqtaityn bolamyz. Shyǵyndardyń bárin qysqartyp jatyrmyz. Kelesi jyldyń basynda 7 enshiles kompaniianyń úsheýi ǵana qalady. Jalpy, 1 000 adam qysqartylady. Osylaisha, ákimshilik shyǵyndar da azaiady. Al direktorlar keńesine táýelsiz sarapshylar tartylady. Biz ol keńesti tolyǵymen jańartamyz. Osylaisha, 2020 jyldyń nátijesinde holdingti shyǵynsyz dárejege shyǵarýdy kózdeimiz", - dep atap kórsetti Qarashókeev.
Aita keteiik, «QazAgro» qyzmetine aýqymdy reformalar júrgiziledi.
Holding óz qyzmetin reformalaý nátijesinde 2020 jyldyń qorytyndysy boiynsha taza paidaǵa shyǵýdy josparlap otyr.
