Qazaqstandyq mys óndirýshi KAZ Minerals kompaniiasy alaiaqtyq faktileriniń kóbeigeni týraly málimdedi.
Bul joly alaiaqtar qazaqstandyqtardyń derbes derekteri men jeke jinaǵyn qolǵa túsirýge tyrysyp, kompaniianyń atyn paidalana bastaǵan. Ásirese, áleýmettik jelide belsendilik artyp tur. Munda jalǵan jarnamaǵa siltemeler men jazbalar jariialanyp jatyr, dep habarlady KAZ Minerals baspasóz qyzmeti.
"Sońǵy ýaqytta alaiaqtar qarjy institýttarymen shektelmei, ekonomikanyń basqa sektoryndaǵy tabysty qazaqstandyq brendterdi, sonyń ishinde KAZ Minerals kompaniiasynyń ataýyn halyqty aldap soǵý maqsatynda qoldanyp jatyr", - dedi KAZ Minerals tobynyń korporativtik bailanys departamentiniń basshysy Maqsut Japabaev.
Ol kompaniia jaqynda ǵana birjadan ketkenin, jeke menshikke ótkenin málimdedi. Sondyqtan qazir onyń aktsiialary erkin ainalymda joq.
"Biz kompaniianyń azamattarǵa arnalǵan investitsiialyq baǵdarlamalardy júzege asyrmaitynyn resmi túrde málimdeimiz. Osy oraida qazaqstandyqtardy saq bolýǵa, aqparattyq qaýipsizdik erejelerin saqtaýǵa, jeke derekterin eshkimge habarlamaýǵa, kompaniianyń resmi resýrstarynda kúmándi aqparatty qaita-qaita tekserýge shaqyramyz., - dedi Maqsut Japabaev.
Kompaniia tiisti vedomstvolarǵa, sonyń ishinde Qazaqstannyń ishki ister ministrligi jáne tsifrlyq damý, innovatsiialar jáne aeroǵarysh ónerkásibi ministrligine úndeý hattar daiyndap jatyr.
KAZ Minerals Limited – Qazaqstandaǵy keń aýqymdy, shyǵyny az ashyq ádispen óndirýdi damytýǵa baǵyttalǵan mys óndirýshi kompaniia. Kompaniia Shyǵys Qazaqstandaǵy Aqtoǵai jáne Pavlodar oblysyndaǵy Bozshakól ashyq kenishterinde, Shyǵys Qazaqstandaǵy úsh jerasty kenishterinde jáne ken baiytý fabrikalarynda, Qyrǵyzstandaǵy Bozymshaq mys jáne altyn kenishterinde jumys júrgizedi.
