Qai qoǵamda bolsyn mánin de, ózektiligin de joimaityn bir qundylyq bar ekeni ras. Ol – qaiyrymdylyq. Adamdardyń bir-birine qaiyrymdylyǵy nemese jekelegen kompaniialardyń keibir jandarǵa qolushyn sozyp, jasaityn qaiyrymdylyǵy, tipti oǵan qatysy joq adamnyń da kóńiline jylý syilaidy. Nege deseńiz, ondai jaǵymdy jańalyqtyń, igi istiń jaqsy sharapaty bolady. «Qýanyshty bólisseń kóbeiedi» degendei, mundai is adamdardy qashanda qaiyrymdylyq jasaýǵa itermelep turady. Osyndai qaiyrymdy istiń biri jýyrda «Embimunaigaz» aktsionerlik qoǵamynyń jumyskerleri tarapynan kórsetildi. Olar ózderiniń jeke qarjysyn shyǵaryp, nóser jaýynnyń kesirinen úiin sý basqan atyraýlyq bir otbasyna jańa úi salyp berdi.
Osy jyldyń mamyr aiynda Atyraý qalasy jaýyn-shashyndy boldy. Kúndi kúnge, túndi túnge jalǵaǵan qatty jaýynnyń saldarynan Gúlbaǵyt Qyzyltashtyń úiin sý basqan edi. Saldarynan turǵyn úi turýǵa jaramsyz dep tanylyp, qaýipsizdik úshin gaz júiesinen de ajyratylyp tastaldy. Dál osy shaqta shańyraqtyń otaǵasy jol-kólik apatyna ushyrap, Gúlbaǵyttyń ózi tórtinshi balasynyń ómirge kelýine bailanysty dekrettik demalysta úide otyrǵan-dy. Oǵan qosa otbasyndaǵy eki birdei naýqas balanyń jaiy turmys taýqymetin ábden tartqan kelinshekti oblystyq ákimdik ókilderiniń halyqpen kezdesýinde muń shaǵýyna, óz jaǵdaiyn aityp, kómek suraýyna májbúrledi. Mine, sol kezde «QazMunaiGaz» Barlaý Óndirý» aktsionerlik qoǵamynyń enshiles kompaniiasy – «Embimunaigaz» aktsionerlik qoǵamynyń basshylyǵy qiynshylyqqa tap bolǵan otbasyǵa járdem berýge sheshim qabyldaidy. «Jumyla kótergen júk jeńil» demekshi, bul otbasynyń úiin salyp berýge «Embimunaigazdyń» munaishylary atsalysyp, óz qarjylaryn aýdarady.
– «QazMunaiGaz» aktsionerlik qoǵamynyń kompaniialar toby áleýmettik damýǵa qatysty barlyq másele boiynsha jergilikti bilikpen tyǵyz áriptestikte jumys atqarady. Biz bul joly Atyraý oblysynyń ákimi Nurlan Noǵaevtyń usynysyn qabyldap, atyraýlyq turǵynǵa kómektesýge sheshim shyǵardyq. Embilik munaishylar qiyn jaǵdaida qalǵan kópbalaly otbasyna kómektesý úshin bir kúndik jalaqylaryn aýdardy. Munai naryǵyndaǵy qazirgi kúrdeli ekonomikalyq jaǵdaiǵa qaramastan, olar adamdardyń basyna túsken qiyndyqqa nemquraidy qaramaidy, – dedi «QazMunaiGaz» Barlaý Óndirý» AQ bas direktory, «Embimunaigaz» AQ bas direktorynyń birinshi orynbasary Qurmanǵazy Esqaziev. Ol bul sózdi Gúlbaǵyt Qyzyltashtyń úiiniń sapasyn óz kózimen kórip, qutty bolsyn aitýǵa kelgen kezinde aitty.
Jańa úidiń qurylysyna úsh ai ýaqyt ketken. Sonymen, biylǵy qazan aiynda bir otbasyn qýanyshqa bólep, tirshilikke degen úmit otyn alaýlatyp jańa úi salynyp bitti. Qurylys jumystary kezinde burynǵy eski úidi bólshektep, syryp tastap, jańa úlgidegi, tipti shatyry men irgetasynyń da poshymy bólek, jylytý qazandyǵy, alliýminii radiatorlary, búkil santehnikasy bar jap-jańa úi turǵyzyldy. Embimunaigazdyq munaishylardyń birligi jarasqan ujymy Qyzyltash otbasynan basqa taǵy da úsh jumysshynyń otbasyna kómekteskenin de atap ótý qajet. Olar «Embimunaigaz» AQ-tyń óndiristik qurylymdyq bólimshesi sanalatyn «Jaiyqmunaigaz» AQ-tyń nóserli jaýyn kezinde úileri zardap shekken úsh jumyskeri eken.
Jalpy, «Embimunaigazdyń» jumysshylary ótken jyly da Atyraý qalasyndaǵy tórt otbasyǵa kómektesip, bir kúndik jalaqylaryn aýdarǵan. Olar da toqtamai jaýǵan jańbyrdan úilerin sý alǵan otbasylar bolatyn. Sonda úiinde múgedek balalary bar tórt otbasynyń baspanasyn jóndeýden ótkizip, jalǵyzilikti bir zeinetkerge jańadan turǵyn úi turǵyzyp bergen edi. Mine, adamǵa adamnyń qadiri osyndaida bilinedi. Naryq zamany ornady, adamdardyń adamgershilik qasieti tómendedi, azaiyp barady dep jii aityp júrsek te, osyndai nar jigitterdiń tirlikteri kókeige úmit uialatady. Qaiyrymdylyqtyń iri-usaq bolyp bólinbeitinin kórsetedi. Bai bol, kedei bol – qaiyrymdy bolý mindetiń degen oiǵa jeteleidi. Al qaiyrymdylyq jasaý qashanda ǵanibet!
Marat AQQUL,
«Egemen Qazaqstan»
.jpeg)