قاي قوعامدا بولسىن مەنٸن دە, ٶزەكتٸلٸگٸن دە جويمايتىن بٸر قۇندىلىق بار ەكەنٸ راس. ول – قايىرىمدىلىق. ادامداردىڭ بٸر-بٸرٸنە قايىرىمدىلىعى نەمەسە جەكەلەگەن كومپانييالاردىڭ كەيبٸر جاندارعا قولۇشىن سوزىپ, جاسايتىن قايىرىمدىلىعى, تٸپتٸ وعان قاتىسى جوق ادامنىڭ دا كٶڭٸلٸنە جىلۋ سىيلايدى. نەگە دەسەڭٸز, ونداي جاعىمدى جاڭالىقتىڭ, يگٸ ٸستٸڭ جاقسى شاراپاتى بولادى. «قۋانىشتى بٶلٸسسەڭ كٶبەيەدٸ» دەگەندەي, مۇنداي ٸس ادامداردى قاشاندا قايىرىمدىلىق جاساۋعا يتەرمەلەپ تۇرادى. وسىنداي قايىرىمدى ٸستٸڭ بٸرٸ جۋىردا «ەمبٸمۇنايگاز» اكتسيونەرلٸك قوعامىنىڭ جۇمىسكەرلەرٸ تاراپىنان كٶرسەتٸلدٸ. ولار ٶزدەرٸنٸڭ جەكە قارجىسىن شىعارىپ, نٶسەر جاۋىننىڭ كەسٸرٸنەن ٷيٸن سۋ باسقان اتىراۋلىق بٸر وتباسىنا جاڭا ٷي سالىپ بەردٸ.
وسى جىلدىڭ مامىر ايىندا اتىراۋ قالاسى جاۋىن-شاشىندى بولدى. كٷندٸ كٷنگە, تٷندٸ تٷنگە جالعاعان قاتتى جاۋىننىڭ سالدارىنان گٷلباعىت قىزىلتاشتىڭ ٷيٸن سۋ باسقان ەدٸ. سالدارىنان تۇرعىن ٷي تۇرۋعا جارامسىز دەپ تانىلىپ, قاۋٸپسٸزدٸك ٷشٸن گاز جٷيەسٸنەن دە اجىراتىلىپ تاستالدى. دەل وسى شاقتا شاڭىراقتىڭ وتاعاسى جول-كٶلٸك اپاتىنا ۇشىراپ, گٷلباعىتتىڭ ٶزٸ تٶرتٸنشٸ بالاسىنىڭ ٶمٸرگە كەلۋٸنە بايلانىستى دەكرەتتٸك دەمالىستا ٷيدە وتىرعان-دى. وعان قوسا وتباسىنداعى ەكٸ بٸردەي ناۋقاس بالانىڭ جايى تۇرمىس تاۋقىمەتٸن ەبدەن تارتقان كەلٸنشەكتٸ وبلىستىق ەكٸمدٸك ٶكٸلدەرٸنٸڭ حالىقپەن كەزدەسۋٸندە مۇڭ شاعۋىنا, ٶز جاعدايىن ايتىپ, كٶمەك سۇراۋىنا مەجبٷرلەدٸ. مٸنە, سول كەزدە «قازمۇنايگاز» بارلاۋ ٶندٸرۋ» اكتسيونەرلٸك قوعامىنىڭ ەنشٸلەس كومپانيياسى – «ەمبٸمۇنايگاز» اكتسيونەرلٸك قوعامىنىڭ باسشىلىعى قيىنشىلىققا تاپ بولعان وتباسىعا جەردەم بەرۋگە شەشٸم قابىلدايدى. «جۇمىلا كٶتەرگەن جٷك جەڭٸل» دەمەكشٸ, بۇل وتباسىنىڭ ٷيٸن سالىپ بەرۋگە «ەمبٸمۇنايگازدىڭ» مۇنايشىلارى اتسالىسىپ, ٶز قارجىلارىن اۋدارادى.
– «قازمۇنايگاز» اكتسيونەرلٸك قوعامىنىڭ كومپانييالار توبى ەلەۋمەتتٸك دامۋعا قاتىستى بارلىق مەسەلە بويىنشا جەرگٸلٸكتٸ بيلٸكپەن تىعىز ەرٸپتەستٸكتە جۇمىس اتقارادى. بٸز بۇل جولى اتىراۋ وبلىسىنىڭ ەكٸمٸ نۇرلان نوعاەۆتىڭ ۇسىنىسىن قابىلداپ, اتىراۋلىق تۇرعىنعا كٶمەكتەسۋگە شەشٸم شىعاردىق. ەمبٸلٸك مۇنايشىلار قيىن جاعدايدا قالعان كٶپبالالى وتباسىنا كٶمەكتەسۋ ٷشٸن بٸر كٷندٸك جالاقىلارىن اۋداردى. مۇناي نارىعىنداعى قازٸرگٸ كٷردەلٸ ەكونوميكالىق جاعدايعا قاراماستان, ولار ادامداردىڭ باسىنا تٷسكەن قيىندىققا نەمقۇرايدى قارامايدى, – دەدٸ «قازمۇنايگاز» بارلاۋ ٶندٸرۋ» اق باس ديرەكتورى, «ەمبٸمۇنايگاز» اق باس ديرەكتورىنىڭ بٸرٸنشٸ ورىنباسارى قۇرمانعازى ەسقازيەۆ. ول بۇل سٶزدٸ گٷلباعىت قىزىلتاشتىڭ ٷيٸنٸڭ ساپاسىن ٶز كٶزٸمەن كٶرٸپ, قۇتتى بولسىن ايتۋعا كەلگەن كەزٸندە ايتتى.
جاڭا ٷيدٸڭ قۇرىلىسىنا ٷش اي ۋاقىت كەتكەن. سونىمەن, بيىلعى قازان ايىندا بٸر وتباسىن قۋانىشقا بٶلەپ, تٸرشٸلٸككە دەگەن ٷمٸت وتىن الاۋلاتىپ جاڭا ٷي سالىنىپ بٸتتٸ. قۇرىلىس جۇمىستارى كەزٸندە بۇرىنعى ەسكٸ ٷيدٸ بٶلشەكتەپ, سىرىپ تاستاپ, جاڭا ٷلگٸدەگٸ, تٸپتٸ شاتىرى مەن ٸرگەتاسىنىڭ دا پوشىمى بٶلەك, جىلىتۋ قازاندىعى, الليۋمينيي رادياتورلارى, بٷكٸل سانتەحنيكاسى بار جاپ-جاڭا ٷي تۇرعىزىلدى. ەمبٸمۇنايگازدىق مۇنايشىلاردىڭ بٸرلٸگٸ جاراسقان ۇجىمى قىزىلتاش وتباسىنان باسقا تاعى دا ٷش جۇمىسشىنىڭ وتباسىنا كٶمەكتەسكەنٸن دە اتاپ ٶتۋ قاجەت. ولار «ەمبٸمۇنايگاز» اق-تىڭ ٶندٸرٸستٸك قۇرىلىمدىق بٶلٸمشەسٸ سانالاتىن «جايىقمۇنايگاز» اق-تىڭ نٶسەرلٸ جاۋىن كەزٸندە ٷيلەرٸ زارداپ شەككەن ٷش جۇمىسكەرٸ ەكەن.
جالپى, «ەمبٸمۇنايگازدىڭ» جۇمىسشىلارى ٶتكەن جىلى دا اتىراۋ قالاسىنداعى تٶرت وتباسىعا كٶمەكتەسٸپ, بٸر كٷندٸك جالاقىلارىن اۋدارعان. ولار دا توقتاماي جاۋعان جاڭبىردان ٷيلەرٸن سۋ العان وتباسىلار بولاتىن. سوندا ٷيٸندە مٷگەدەك بالالارى بار تٶرت وتباسىنىڭ باسپاناسىن جٶندەۋدەن ٶتكٸزٸپ, جالعىزٸلٸكتٸ بٸر زەينەتكەرگە جاڭادان تۇرعىن ٷي تۇرعىزىپ بەرگەن ەدٸ. مٸنە, ادامعا ادامنىڭ قادٸرٸ وسىندايدا بٸلٸنەدٸ. نارىق زامانى ورنادى, ادامداردىڭ ادامگەرشٸلٸك قاسيەتٸ تٶمەندەدٸ, ازايىپ بارادى دەپ جيٸ ايتىپ جٷرسەك تە, وسىنداي نار جٸگٸتتەردٸڭ تٸرلٸكتەرٸ كٶكەيگە ٷمٸت ۇيالاتادى. قايىرىمدىلىقتىڭ ٸرٸ-ۇساق بولىپ بٶلٸنبەيتٸنٸن كٶرسەتەدٸ. باي بول, كەدەي بول – قايىرىمدى بولۋ مٸندەتٸڭ دەگەن ويعا جەتەلەيدٸ. ال قايىرىمدىلىق جاساۋ قاشاندا عانيبەت!
مارات اققۇل,
«ەگەمەن قازاقستان»
.jpeg)