Almaty politsiiasy sońǵy qońyraý men mektep bitirý keshteri qarsańynda kúsheitilgen jumys rejimine kóshetinin málimdedi. Quqyq qorǵaý organdary ata-analar men muǵalimderdi túlekterdiń qaýipsizdigine jiti mán berýge shaqyrdy, dep habarlaidy ult.kz.
Almaty qalalyq politsiia departamenti Qoǵamdyq qaýipsizdik basqarmasynyń bastyǵy Timýr Noǵaibaev mereke kúnderi jasóspirimderdiń baqylaýdan tys qalyp, túrli qaýipti jaǵdailarǵa tap bolatyn derekteri jiileitinin aitty.
Onyń sózinshe, túlekter arasynda qala syrtyndaǵy úilerdi jaldaý, ishimdik ishý, kólikpen qaýipti serýender uiymdastyrý jáne zańsyz avtokortejder jasaý sekildi áreketter kezdesedi.
— Jasóspirimder áleýmettik jelige áserli video túsiremiz dep, jol qozǵalysy erejelerin óreskel buzyp jatady. Mundai áreketter keide qaiǵyly jaǵdailarǵa ákelýi múmkin. Biz kúsheitilgen rejimde jumys isteimiz. Degenmen ata-analar men pedagogterdiń qoldaýynsyz qaýipsizdikti tolyq qamtamasyz etý qiyn. Balalardy baqylaýsyz qaldyrmaýdy, olardyń kólikpen júrýine jol bermeýdi jáne únemi bailanysta bolýdy suraimyz, — dedi Timýr Noǵaibaev.
Politsiianyń málimetinshe, negizgi maqsat — quqyqbuzýshylyqtardyń aldyn alý jáne kámeletke tolmaǵandardyń qatysýymen bolatyn tótenshe jaǵdailarǵa jol bermeý.
Sondai-aq vedomstvo ata-analar men muǵalimderge túlektermen qaýipsizdik pen qoǵamdyq tártip erejelerin aldyn ala talqylaýǵa keńes berdi.
Aita keteiik, buǵan deiin Qazaqstan Oqý-aǵartý ministrligi mektep bitirý keshterin ótkizý tártibin naqtylaǵan edi. Jańa talapqa sáikes, mektep bitirý keshterin mektepten tys jerde ótkizýge tyiym salynady. Sonymen qatar ata-analardan nemese oqýshylardan aqsha jinaýǵa qatań shekteý qoiylǵan.
