Foto: ashyq derekkóz
Pavlodar qalasynyń prokýrorlary «Áleýmettik meditsinalyq saqtandyrý qory» qarajatynyń jumsalýyna júrgizilgen tekserý barysynda birqatar zańsyz áreketterdi áshkereledi, dep habarlaidy Ult.kz.
Qadaǵalaý nátijesinde meditsinalyq qyzmetterdiń jalǵan kórsetilgeni anyqtalǵan. Atap aitqanda, nevropatolog, kardiolog, hirýrg, psiholog sekildi dárigerlerdiń qabyldaýlary qaitys bolǵan adamdarǵa «júrgizilgeni» tirkelgen. Sonymen qatar akýsher-ginekolog dárigerlerdiń keńesi er adamdarǵa kórsetilgen dep rásimdelgen jaǵdailar da bolǵan.
Budan bólek, emdeý qyzmetterin negizsiz qaitalaý arqyly qosarlanǵan tólem alý faktileri belgili boldy. Tekserý barysynda tiisti sertifikattary men ruqsat qujattary joq adamdardyń da meditsinalyq kómek kórsetkeni anyqtalǵan.
Prokýratýranyń málimetinshe, zań buzýshylyqtardy joiý jáne kináli tulǵalardy jaýapkershilikke tartý baǵytynda tiisti sharalar qabyldanýda. Nátijesinde memleketke keltirilgen 100 mln teńgeden astam zalal ótelgen.
Qazirgi tańda sotta meditsina salasynda zańsyz kásipkerlik qyzmet arqyly 62 mln teńge jymqyrý jáne 41 mln teńge kóleminde memleketke ziian keltirý derekteri boiynsha eki qylmystyq is qaralýda.
