QR Ekologiia, geologiia jáne tabiǵi resýrstar ministrligi brakonerler oǵynan jaraqat alǵan inspektorlar týraly aqparat jariialady, dep habarlaidy "Ult aqparat".
«Nurtazinov Qanysh Serikuly 1976 jyly 24 qańtarda dúniege kelgen. Ol – Qaraǵandy oblysy Ulytaý aýdanynyń Qoskól aýylynyń turǵyny. 2016 jyldyń 5 qańtarynda «Ohotzooprom «ÓB» RMQK jumysqa turǵan. Onyń artynda áieli, úsh qyzy jáne 2011 jyly týǵan uly qaldy», - delingen ministrliktiń baspasóz qyzmetiniń habarlamasynda.
Qazirgi ýaqytta marqumnyń denesin týǵan aýylyna jetkizý máseleleri talqylanyp jatyr.
Ministrliktiń habarlaýynsha, jaraqat alǵan ekinshi inspektor Ospanov Samat Kóshbergenuly 1975 jyly Aqmola oblysynda týǵan. Bilimi - ortasha-arnaýly, zańger. Qazirgi tańda Samatqa Derjavinsk aýdandyq aýrýhanasynda ota jasalýda.
Aita keteiik, Aqmola oblysy Jarqaiyń aýdanynda inspektorlar tabiǵatty qorǵaý zańnamasyn buzǵandardyń aldyn alý sharasyn júrgizip, kiik atý faktisin anyqtaǵan. Zań buzýshylardyń izine túskende 10 óńirge – Qostanai oblysyna tiesili aq tústi «Niva» markaly avtokólikten (memlekettik nómiri belgisiz) oq atylyp, eki inspektor jaraqat alǵan.
Keiinirek QR AShM Orman sharýashylyǵy jáne janýarlar álemi komitetiniń baspasóz hatshysy Sáken Dildahmet jaraqat alǵan brakonerlerdiń biriniń qaitys bolǵany týraly habar taratty.
Sondai-aq brakonerlerdiń qolynan qaza tapqan inspektordyń artynda tórt balasy qalǵandyǵy belgili boldy.
Al QR Ekologiia, geologiia jáne tabiǵi resýrstar ministri Maǵzum Myrzaǵaliev brakonerler qolynan mert bolǵan inspektordyń otbasyna kóńil aityp, onyń otbasyna barlyq qajetti kómektiń kórsetiletindigin jetkizdi.
Aqmola oblysy Jarqaiyń aýdanynyń politsiia bólimi kúdiktilerdi izdep jatyr.
