Foto: QR Bas prokýratýra
Túrkistan oblysy Ordabasy aýdany Temirlan aýylynda jańa mýzykalyq óner mektebiniń qurylysy bastaldy. Bul is-shara Memleket basshysynyń qaitarylǵan kapitaldy halyq igiligi úshin paidalaný tapsyrmasy aiasynda júzege asyrylýda, dep habarlaidy Ult.kz.
Rásimge oblys ákimi, prokýrory, Bas prokýratýra ókilderi, aýyl aqsaqaldary men turǵyndar qatysty. Qatysýshylar bolashaq urpaqqa arnap ýaqyt kapsýlasyn salyp, mekteptiń el úshin mańyzdylyǵyn atap ótti.
Quny 890 mln teńge bolatyn 300 oqýshyǵa arnalǵan jańa mektep kórshiles aýyldardyń da balalaryn qabyldai alady. Buǵan deiin aýylda 1974 jyly salynǵan apatty jaǵdaidaǵy eski mýzykalyq mektep jumys istep kelgen.
Joba zańsyz iemdelgen aktivterdi memleketke qaitarý jumystarynyń nátijesin kórsetetin naqty mysal bolyp otyr. Búginge deiin 610 mlrd teńge qaitaryldy, onyń ishinde 506 mlrd teńge aqshalai qarajat, al 103 mlrd teńge múlik retinde memleketke tústi.
Aita keteiik, Aqmola oblysyndaǵy Qosshy jáne Makinsk qalalarynyń turǵyndaryn sýmen qamtamasyz etý úshin Arnaýly memlekettik qordan qarajat bólingenin jazǵan bolatynbyz.
