Qyzylordanyń «Qaisar» fýtbol klýby 104 million teńgege aýktsionǵa qoiyldy, dep habarlaidy "Ult aqparat" Elektrondyq saýda-sattyqtar tiziliminiń portalyna silteme jasap.
Biylǵy fýtbol maýsymyn sátsiz aiaqtaǵan «Qaisar» komandasy satýǵa shyǵaryldy. Klýb Qyzylorda oblysynyń dene shynyqtyrý jáne sport basqarmasynyń menshiginde. Quryltaishysy – Qyzylorda oblysynyń qarjy basqarmasy.
«Saýda-sattyq túri: satyp alý quqyǵymen senimgerlik basqarýǵa beriledi. Bastapqy baǵasy – 104 million 223 myń teńge, kepildi jarna – 15 million 633 myń 450 teńge, aýdarylǵan úles – 3 million 546 myń 81 teńge», - delingen memlekettik múlik tiziminiń elektrondyq saýda alańynda shyǵarylǵan aqparatta.
Birinshi tender osy jyldyń 6 qazanynda ótýi kerek edi. Biraq aýktsionǵa qatysýshylardan ótinim túspegen.
