Sáláfitter maǵan qarsy nebir qiturqy áreketterin jasaýda. Ásirese QMDB — ǵa apparat jetekshisi bolǵan kúnnen bastap jalǵan avtorlardyń atymen maǵan túrli jalalaryn jaýyp keledi. Sebebi belgili. Men sáláfitterge túbegeili qarsymyn. «Din men dil» atty eki tomdyq kitabymda sáláfitterdiń qatelikterin áshkerelep, hanafi mázhaby men mátýrýdi aqidasynyń durystyǵyn, Qoja Ahmed Iasaýidiń sopylyq jolynyń shariǵatqa qaishy emes ekendigin dáleldeýge tyrystym. Bul olarǵa aýyr tidi. Tipti Elbasynyń tikelei qoldaýymen ashylǵan «Islam jáne bilim» qorynyń qarjylandyrýymen neshe ret basylyp, tegin taratylǵan osy kitabymdy kórgen jerlerinde joiýǵa tyrysqandyqtaryna da kýá boldym.
Olardyń negizsiz qaralaý áreketteri menimen shektelip otyrǵan joq. Búginde sáláfilermen belsendi kúresip júrgen Ersin Ámire men Arman Qýanyshbaev, Sansyzbai Shoqanov, Rizabek Battalov sekildi bilikti mamandardy da qaralap, olardy shiit, habashit jasap júrgender de osy sáláfitter. Meni birese, Mysyrdaǵy kóterilisti uiymdastyrǵan Iýsýf Qardaýidiń shákiriti, memleketke qarsy adam dese, endi birde Nurshy-Gúlenshi dep aiyptady. Eshbir dálelsiz arnaiy tapsyryspen jazylǵan bul súikemelerdiń avtorlarynyń kim ekenin de, qai aýyldan esip turǵanyn da jaqsy bilemin. Ras, doktorlyq dissertatsiiamdy jazyp jatqan sońǵy úsh jylda bulardyń meni qaralaýy báseńsidi. Alaida keshegi Aqtóbedegi oqiǵadan keiin sáláfilerdi zańmen tyiym salý kerek degen usynystarymnan soń bulardyń maǵan shabýyly qaita bastalyp ketti. Biraq bul joly aitarǵa eshnárse taba almaǵannan keiin burynǵy jazdyrǵan shimailaryn jelilerge kúmpildetip qaita salyp jatyr. Ashyǵyn aitaiyn men Gúlen jamaǵatynyń Qazaqstandaǵy kósemi de, belsendi múshesi de emespin. Biraq olar jaily obektivti pikirdemin. Quranda: «Qandai bir qaýymǵa (topqa, rýǵa, jamaǵatqa, ultqa) degen dushpandyqtaryń senderdi olarǵa qarsy ádiletsizdikke itermelemesin» -delinedi. Islamdy balaq pen saqaldyń deńgeiine túsirip, dindi syrtqy pishinmen ǵana shektep, dindarlyqty jattandy shablondarmen sóileý dep túsinetin, eldiń ishine iritki salýdan basqa maqtanatyn isteri joq sáláfiler men Sibirden bastap, Afrikaǵa deiin, jańylyspasam álemniń 160 memleketinde myńnan asa mektep ashyp, aǵartýshylyqpen ainalysyp jatqan Gúlen jamaǵatyn bir deńgeige qoia almaimyn. Gúlenniń aqidasy mátýrýdi, mázhaby hanafi ekendigi málim. Al onyń jamaǵaty bolashaqta memleketimizge qaýipti me? Ony memleketimizdiń quryǵy uzyn quzyrly oryndary anyqtaýy tiis. Meniń osyndai obektivti kózqarasym úshin meni Gúlenshi deitinder de tabyla keter. Kimniń aýzyna qaqpaq bolasyń?!
Keshegi Týrkiiada bolǵan memlekettik tóńkeriske umtylý áreketi Gúlenmen bailanystyrylyp jatyr. Al Gúlen: «Meniń eshqatysym joq. Halyqaralyq deńgeide beitarap komissiia qurylyp, tóńkeris áreketine meniń qatysymnyń bar-joqtyǵy anyqtalsyn , nátijesi nendei bolsa da, men oǵan rizamyn. Eger meniń qatysymnyń bar ekendigi anyqtalsa, bul jerden meni eshkimniń alyp ketýiniń qajeti joq, ózim bilet alyp, óz aiaǵymmen baramyn» — degen usynysyn aitty. Gúlenniń usynysy boiynsha halyqaralyq komissiia qurylyp, onyń qatysy bar ekendigi rasymen de dáleldenip jatsa, onda eshkimniń kózjasyna qaramastan Qazaqstandaǵy litseilerin jabý kerek. Jastarymyzǵa keremet bilim berip jatqandyqtary olardy aqtap ala almaidy. Memleketimizdiń qaýipsizdigi birinshi orynda bolýǵa tiis!
