Almaty qalasy máslihatynyń eks-depýtaty Qairat Qudaibergen ýaqytsha tergeý izoliatorynda koronavirýs juqtyrdy. Bul týraly onyń advokaty Murat Ámitov aitty, - dep habarlaidy Massaget.kz.
Advokattyń sózinshe, 17 shildede tergeý izoliatoryna anasy kelgende ol densaýlyǵyna shaǵymdanyp, jaqyndamaýyn ótingen. Osydan keiin izoliatorǵa jedel járdem shaqyrylyp, odan COVID-19 synamasy alynǵan.
"Biz prokýrorǵa ótinish berdik. Óitkeni olar Qairattyń qatysýymen tergeý áreketterin júrgizýi kerek edi, al ol aýyryp qaldy. Bul bultartpaý sharasyn ózgertýge negiz ekenin aittyq. Keshe bizdiń qorqynysh rastalyp, odan omikron shtamy anyqtaldy. Qazir ol otyrǵan ýaqytsha tergeý izoliatorynda meditsinalyq kómek kórsetýge jaǵdai joq. Sondyqtan biz ony emdeý mekemesine nemese meditsinalyq bólimshesi bar tergeý izoliatoryna aýystyrýdy suradyq. Sondai-aq, sot ony meditsinalyq kómek alý úshin úiqamaqqa aýystyrý múmkindigin qarastyrýy kerek", - dedi advokat Murat Ámitov.
Ámitovtyń aitýynsha, Qudaibergenniń densaýlyǵyna bailanysty prokýratýra ony qamaý merzimin eki aiǵa uzartýdy suraǵan. Sýdia qamaýda ustaý merzimin bir aiǵa uzartyp, prokýrorǵa tiisti meditsinalyq baqylaýdy qamtamasyz etýdi tapsyrdy.
Eske salaiyq, 21 sáýirden 22-ne qaraǵan túni belgili kásipker, Almaty qalasy máslihatynyń depýtaty Qairat Qudaibergenniń qamaýǵa alynǵany týraly aqparat tarady. Bul aqparatty onyń advokaty Murat Ámitov jetkizgen edi.
Almaty prokýratýrasy kásipkerdiń qańtar aiyndaǵy jappai tártipsizdikterdi uiymdastyryp, qatysty degen kúdikke ilingenin aitty.
Sol ýaqyttan beri qalalyq máslihat depýtatyn qamaýda ustaý merzimi birneshe ret uzartyldy. Sońǵy ret sot qaýlysymen 21 shildege deiin qamaýda ustaý bultartpaý sharasy sanktsiialandy.
