«Astana» halyqaralyq qarjy ortalyǵynyń basqarýshysy Qairat Kelimbetov Ázerbaijannyń halyqaralyq bankinen qazaqstandyqtardyń zeinetaqylyq qarjysyn artyǵymen qaitaryp alýǵa ýáde berdi.
Bul jaiynda ol saiasattanýshy Dosym Sátpaev pen «Qarjylyq erkindik» qoǵamdyq qory qamqorshylyq keńesiniń basshysy Bota Jumanovaǵa bergen suhbatynda málim etti, habarlaidy QazAqparat.
«Qarjynyń barlyǵy tolyq kólemde Biryńǵai jinaqtaýshy zeinetaqy qoryna (BJZQ) arnaiy nusqamen qaitarylady. Endi negizgi boryshker retinde Ázerbaijan úkimeti qarastyrylady. Bul óz kezeginde 2014 jyldyń qazanynda eýroobligatsiialardy 18 jylǵa 4 paiyz mólsherlememen satyp alǵanmen birdei», - dedi Kelimbetov.
«2014 jyldyń qazanyndaǵy 40 mlrd teńgege toqtalsaq, 2015-2016 jyldardaǵy qunsyzdanǵannan keiin onymen ne boldy? Teńgemen dál sol soma qaldy. Al dollar máninde onyń quny múldem basqasha bolyp qalyptasty. Dollarlar tolyq kólemde paiyzben qaitarylady. Eshteńe bolmaǵandai 250 mln dollar somasyndaǵy barlyq qarjy paiyzymen qaitarylady. Eger de teńgemen 15 jylǵa eseptesek, ol qarjy aitarlyqtai artyq kólemde keledi», - dedi ol.
Onyń sózine qaraǵanda, 2014 jyldyń qazanynda Ázerbaijannyń halyqaralyq bankine 79 mlrd teńge emes, 45 mlrd teńgeden astam (dollaryna 180 teńge baǵamymen) qarjy investitsiialandy.
«Sondyqtan 250 mln dollar satyp alyndy. Bul aqsha 2014 jyldyń qazanynda júrgizilgen teńge baǵamyn túzetý sharalarynan qorǵaldy. Sonymen qatar bul qarjy qaitaryla bastady. Búginde 50 mln dollar tólemdermen qaitaryldy. Qazirgi baǵammen 17 mlrd teńgeni qurap otyr. Iaǵni 45 mlrd saldyq, 17 mlrd teńgesi tólendi. Endi qalǵanyn ázerbaijandyq úkimet tiisti jolmen qaitaratyndyǵyn aitty», - dedi Qairat Kelimbetov.
Sonymen qatar ol óziniń BJZQ direktorlar keńesiniń quramyna enýiniń basty sebebi ázerbaijandyq banktiń obligatsiialaryna salynǵan qarjyny tolyq kólemde qaitarýǵa qatysty ekenin atap ótti.
«Bul qarjy qaitarylady», - dep qadap aitty Kelimbetov.
