Elimizdiń Ishki ister jáne Aýyl sharýashylyǵy ministrlikteri jemqorlyqtyń aldyn alý sharalaryn qabyldamai otyr. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev aitty, dep habarlaidy "Ult aqparat".
«Memleket basshysynyń tapsyrmasymen jemqorlyqtyń aldyn alý boiynsha basshylary belsendi sharalar qabyldamaityn memlekettik organdar anyqtaldy. 2020 jyldyń qorytyndysy boiynsha – bul Ishki ister jáne Aýyl sharýashylyǵy ministrlikteri, sondai-aq Memlekettik kirister komiteti. Muny Transparency Kazakhstan áleýmettik zertteýiniń jáne qylmystyq-tergeý praktikasynyń nátijeleri rastaidy. Elbasynyń «Adaldyq alańy» jobasyn barlyq óńirler men ortalyq memlekettik organdar deńgeiinde taratý týraly tikelei tapsyrmasyna qaramastan, IIM turmystyq jemqorlyq problemasy tolyq sheshilgendei, jobalyq keńseniń ashylýyna kedergi keltirýde. Sybailas jemqorlyq táýekelderine syrtqy taldaý júrgizýden bas tartýy da túsiniksiz», - dedi Alik Shpekbaev agenttiktiń alqa otyrysynda.
Agenttik basshysynyń aitýynsha, AShM jemqorlyqqa qarsy keshendi monitoringtiń qorytyndylary boiynsha burynǵydai kóshtiń artynda qayp otyr.
Vedomstvo ásirese aýyl sharýashylyǵy taýaryn óndirýshilerdi sýbsidiialaý tártibin jetildirýge qatysty agenttik usynystaryn tolyq kólemde oryndamaidy.
«Bailar baiyp, kedeiler kedeilene beredi demekshi, bul jemqorlyqty ǵana emes, sonymen qatar biznesti teńsiz jaǵdaiǵa qoiady. Tolyqqandy aldyn alý sharalary Memlekettik kirister komitetinde de joq. Azamattar men kásipkerlerdiń keden jáne salyq organdaryndaǵy júieli túrde alym-salyq alýǵa turaqty shaǵymdary - munyń aiqyn dáleli. Jalpy, barlyq memlekettik organdar men uiymdar óz jumysynyń jemqorlyqqa qarsy áleýetin ósirip, tipti qyzmetkerleri jemqorlyq áreketteri týraly oilaýǵa da mursha bermeitin jaǵdai jasaýy tiis», - dedi agenttik tóraǵasy.
