Almatyda qaýip tobyndaǵy barlyq patsient dári-dármekpen tolyq qamtamasyz etiledi. Bul týraly óńirlik kommýnikatsiialar qyzmeti alańyndaǵy onlain-suhbat barysynda №4 qalalyq emhananyń klinikalyq farmakology Áigerim Toqtybaeva aitty, dep habarlaidy "Ult aqparat".
Onyń aitýynsha, búgingi kúni № 4 qalalyq emhanada 85 437 adam tirkelgen. Onyń ishinde dispanserlik esepte 17 060 patsient 45 nozologiia boiynsha tur.
«Pandemiia kezinde bizdiń emhana 338 273 364 teńgege 68 nozologiia boiynsha 10 140 patsientti dárilik zattarmen qamtamasyz etti. Bul topqa 0-den 96 jasqa deiingi naýqastar kiredi. Belgili bir aýrýlary bar dispanserlik esepte turǵan patsientter, tegin meditsinalyq kómektiń kepildik berilgen kólemi men mindetti áleýmettik meditsinalyq saqtandyrý júiesi sheńberinde, QR Densaýlyq saqtaý ministrliginiń buiryǵymen bekitilgen dárilik zattar men meditsinalyq buiymdardyń tizbesine sáikes, tegin dárilik zattarmen jáne meditsinalyq buiymdarmen qamtamasyz etiledi», — dep atap ótti Á. Toqtybaeva.
Belgili bir aýrýlary bar azamattardyń jekelegen sanattary ambýlatoriialyq deńgeide tegin jáne jeńildiktegi dárilik zattarmen jáne meditsinalyq buiymdarmen qamtamasyz etiledi.
Sonymen qatar, koronavirýs infektsiiasyna bailanysty ambýlatoriialyq deńgeide tegin beriletin bes ataý boiynsha preparattardyń tizimi anyqtaldy.
«Olardyń ishinde úsh antikoagýlianttyq preparat-apiksaban, rivaroksaban, dabigatran jáne antipiretikter – paratsetamol, ibýprofen bar. Bul preparattardyń barlyq ataýlary koronavirýs infektsiiasy bar adamdarǵa tegin beriledi», – dep túsindirdi Á.Toqtybaeva.
