QR Eńbek jáne halyqty áleýmettik qorǵaý ministri Birjan Nurymbetov elimizde qatań karantin engizilse, eńbek naryǵyndaǵy jaǵdai qandai bolatynyn sipattap berdi, dep habarlaidy QazAqparat.
«Epidemiologiialyq ahýalǵa toqtalsaq, Úkimet elimizde epidemiologiialyq jaǵdaidyń turaqtylyǵyn saqtaý úshin barlyq qajetti sharalardy qabyldaýda. Eger indetke qatysty jaǵdai ýshyǵyp ketse, Úkimet ekonomikany, biznesti jáne halyqty qoldaý boiynsha tiisti qadamdardy jasaidy. Alaida naqty bir tólemder men somalar jaiynda aitý erterek», - dedi B. Nurymbetov Ortalyq kommýnikatsiialar qyzmetinde.
Sonymen qatar ol Eńbek ministrligi indetke qatysty aldaǵy bolýy múmkin jaǵdaiǵa tiisti baǵalaý júrgizgenin aitty.
«Eńbek resýrstaryn damytý ortalyǵymyz jaǵdaidyń eń nashar degen nusqasyna tiisti baǵalaý júrgizdi. Osy oraida bizde kóktemde bolǵan qatań karantindik sharalardy eskerip, eńbek naryǵyn zerdeledi. Eger Úkimet osyndai qatań sharalardy qabyldaýǵa májbúr bolsa, onda 4 millionǵa jýyq adam ózderiniń jumys oryndaryn saqtap qalady», - dedi vedomstvo basshysy.
Bul turǵyda birinshi kezekte qurylys, aýyl sharýashylyǵy, densaýlyq saqtaý salalarynda saqtalady.
«2,5 million adam qashyqtan jumys isteý rejimine ótedi. Bul joǵary biliktilik mamandaryna qatysty. 2 millionǵa jýyq adamǵa qatysty jumys ýaqytynyń qysqarýy bolýy múmkin. Osy oraida saýda, kólik, tamaqtandyrý salasyn qamtýy yqtimal. Bizdiń sarapshylardyń esebinshe, qatań karantin engizilse, taǵy 160 myńǵa tarta adam jumystan bosatylyp, jumyssyz qalýy múmkin», - dep túsindirdi ministr.
