QR ishki ister ministri Qalmuhanbet Qasymov Denis Tenniń óliminen keiin úsh kún boiy uiyqtamaǵanyn málimdedi, dep habarlaidy Sputnik Qazaqstan tilshisi.
Ministr qylmys jasalǵan kúni TMD elderindegi áriptesterimen birge Aqtaýda bolǵanyn aitty.
"Tenniń ólimi týraly telefonmen habar bergennen keiin, bul is turaqty baqylaýymda boldy. Qylmyskerlerdi anyqtap, birinshisin ustaǵanda, oqiǵanyń qalai bolǵanyn shamaladyq. Ekinshi qylmyskerdi ustaý sál qiynǵa soqty. Óitkeni naqty mekenjaiy bolǵan joq, sondyqtan qosymsha kúsh tartyp, tutas shaǵyn aýdandy qorshaýǵa aldyq. Ony tańerteń bir úiden shyǵyp, ekinshisine bara jatqan jerden ustadyq. Al áiel telefonmen bailanysqa shyqqannan keiin qolǵa tústi. Úsh túndi uiqysyz ótkizdik. Osy oqiǵa týraly prezidentke eki ret baiandadym. Bul qylmys qoǵamda úlken rezonans týdyrdy, tragediia báriniń qabyrǵasyn qaiystyrdy. Politsiia qylmysty áshekereleý úshin baryn saldy", — dedi ministr OKQ-de ótken brifingte.
Aita ketsek, Denis Tenniń óliminen keiin qazaqstandyqtar ishki ister ministriniń otstavkaǵa ketýin talap etken edi. Búgin Qalmuhanbet Qasymov otstavkaǵa ketý oiynda joq ekenin bildirdi, aitýynsha, mundai sheshimdi prezident qana qabyldaidy.
Qazaqstandyq sportshy osy jyldyń 19 shildesinde Almatyda avtokólik urylarynyń qolynan qaza tapty.
Atalǵan fakti boiynsha úsh adam ustaldy. Olar Jambyl oblysynyń týmasy 24 jastaǵy Nuraly Qiiasov, Qyzylorda oblysynyń 1994 jylǵy týmasy Arman Qudaibergenov jáne Janar Tolybaeva. Alǵashqy ekeýi urlyq, qaraqshylyq jáne adam ólimi boiynsha, al áiel qylmys jasalǵanyn habarlamaǵany úshin aiyptalyp otyr.
