Elimizdiń tasqyn sý basqan óńirlerinen 6 myń adam qaýipsiz jerge kóshirildi. Bul jaiynda búgin Úkimettiń selektorlyq rejimdegi otyrysynda QR Ishki ister ministri Qalmuhanbet Qasymov málim etti, dep habarlaidy Ult.kz tilshisi QazAqparat agenttigine silteme jasap.
«Elimiz boiynsha sý basqan aimaqtardan 6 myń adam, 87 myń bastan astam mal qaýipsiz jerge shyǵaryldy. Qazirgi ýaqytta sý tasqyny saldaryn joiý úshin qaýipti ýchaskelerge 3 myńnan astam adam jumyldyryldy. Olar: qutqarýshylar, politsiia qyzmetkerleri, Ulttyq gvardiianyń áskeri qyzmetshileri jáne jergilikti atqarýshy organdardyń qyzmetkerleri. 722 tehnika tartyldy», - dep atap ótti ministr.
Onyń dereginshe, shuǵyl jáne injenerlik qorǵanys jumystary júrgizilip, 24 myń metrden astam ýaqytsha bógetter turǵyzylǵan. Almaty, Jambyl oblystarynyń jáne Astana qalasynyń quqyq qorǵaý organdarynyń qyzmetkerleri sý tasqyny oryn alǵan aimaqqa halyqtyń dúni-múlkiniń tonalýyna jol bermeý, halyqqa kómek kórsetý úshin jiberilgen.
«Sý basqan aimaqtaǵy jaǵdaidy baǵalaý úshin keshe jáne búgin tikushaqpen sholyp shyǵý sharasy júrgizilýde. Taiaý apta ishinde Nura, Esil, Jabai jáne Kolýton ózenderindegi sý deńgeiiniń artýy boljanýyna bailanysty Qaraǵandy men Aqmola oblystaryndaǵy ahýal kúrdelene túsedi dep kútýdemiz», - dedi Qasymov.
Aita keteiik, buǵan deiin habarlaǵanymyzdai elimizdegi 7 óńirdiń 52 eldi mekenin sý basty.
