2021 jyly Qaraǵandy oblysynda shamamen 19 myń adam gazben qamtylady. Bul týraly búgin Úkimet otyrysynda Qaraǵandy oblysynyń ákimi Jeńis Qasymbek aitty, dep habarlaidy "Ult aqparat"
«Oblysta «Saryarqa» gaz qubyry arqyly 114 eldi mekendi gazdandyrý josparlanǵan. Birinshi kezeńde úsh qalada 3 myńǵa jýyq úi gazben qamtylady. Qazirgi ýaqytta Temirtaý jáne Jezqazǵan qalalarynda qabyldaý aktilerine qol qoiyldy jáne qurylys jumystary aiaqtaldy. Jelilerdi «QazTransGaz» AQ-qa senimgerlik basqarýǵa berý rásimi bastaldy. Osydan keiin tutynýshylardyń daiyndyǵyna qarai 1056 úi úshin gazben qamtamasyz etiledi», - dedi óńir basshysy.
Onyń aitýynsha, Qaraǵandy qalasynda qurylys jumysynyń 70 paiyzy jasalǵan.
Qurylys jumystaryn aiaqtaý bekitilgen kestege sáikes, 2021 jyldyń mamyr aiyna josparlanǵan. Nysan iske qosylǵannan keiin 1 865 úige gaz beriledi.
«2021 jyly Qaraǵandy, Temirtaý jáne Jezqazǵan qalalaryndaǵy 3 800 úidi qamti otyryp, 2-shi iske qosý kesheni qurylysyn bastaý kózdelgen. 2021 jyly Jańarqa, Osakarov aýdandaryna jáne Shahtinsk qalasynda gazben jabdyqtaý jelileriniń qurylysy bastalady. Birinshi kezeń 3 myńnan astam úidi gazdandyrýǵa múmkindik beredi. Sondai-aq 2021 jyly Saran qalasynyń Aqtas jáne Dýbovskaia kentterin gazben jabdyqtaý úshin jetkizýshi gaz qubyryn salýdy josparlap otyrmyz. RTI zaýyty bazasynda salynyp jatqan 2 zaýytqa da gaz tartylatyn bolady. Osylaisha, 2021 jyly shamamen 19 myń adam gazben qamtylady. Tolyq qarjylandyrylǵan jaǵdaida 2030 jylǵa qarai oblystyń 1 mln 100 myń turǵyny gazben qamtylady. Óńirdi gazdandyrý máselesi turaqty baqylaýda», - dedi Jeńis Qasymbek.
