Foto: Aqorda
Qazaqstan Prezidenti osy ýaqytqa deiin ótken Konsýltativtik kezdesýlerdiń nátijesi aimaqtyq yntymaqtastyqqa júieli, jan-jaqty ári, eń bastysy, senimdi sipat berip, buryn-sońdy bolmaǵan deńgeige shyǵarǵanyn aitty, dep habarlaidy Aqordanyń baspasóz qyzmeti.
"Birlesken kúsh-jigerdiń arqasynda jyldar boiy qordalanǵan máseleler sheshilip jatyr. Aimaqtyń turaqtylyǵy men qaýipsizdigin qamtamasyz etý úshin keshendi sharalar qabyldanýda. Shekara, sýmen qamtamasyz etý, migratsiia máseleleri josparly túrde rettelip, ózara saýdadaǵy kóptegen kedergiler joiyldy. Shekaradaǵy ótkizý pýnktteri jańǵyrtylyp jatyr. Kólik qatynasynyń múmkindikteri keńeiip, jańa baǵyttar ashylýda. Saýda-ekonomikalyq jáne investitsiialyq yqpaldastyq qarqyndy damyp keledi", – dedi Memleket basshysy.
Prezidenttiń aitýynsha, mádeni-gýmanitarlyq bailanys mazmundyq turǵydan tolyqtyrylýda. Memleket basshysy mádeniet kúnderi, qolóner sheberleriniń kórmesi, ulttyq taǵam festivalderi, jastar forýmdary men basqa da is-sharalar turaqty túrde ótkizilip kele jatqanyna nazar aýdardy.
"Ótken jyldar ishinde Konsýltativtik kezdesýler aimaqtyń halyqaralyq sýbektiligi men birligin tanytatyn, sondai-aq qazirgi syn-qaterlerge tótep berýge daiyndyǵyn kórsetetin tiimdi alańǵa ainalǵanyn senimdi túrde aita alamyn. Ortalyq Aziia qashanda biregei órkenietter toǵysqan aimaq bolǵan. Onyń jalpy álemdik progreste atqaratyn róli zor. Búginde ortaq tarihymyz ben halyqtarymyzdyń dúnietanymynyń uqsastyǵyna arqa súiep, Ortalyq Aziianyń jańa kelbetin qalyptastyramyz. Ony keleshekke umtylatyn ári mol múmkindikter mekeni retinde tanytamyz. Bul sammit osy joldaǵy mańyzdy beleske ainalatynyna senimdimin", – dedi Prezident.
