Ult portaly Memleket basshysy Qasym-Jomart Toqaevtyń Qazaqstan halqyna úndeýiniń tolyq mátinin kópshilik nazaryna usynady.
Búgin elimizge jáne árqaisymyzǵa qatysty asa mańyzdy Úndeý jariialap otyrmyn.
Elimizdiń Konstitýtsiiasyna sáikes Qazaqstan Respýblikasy Prezidentiniń kezekten tys sailaýyn 2019 jyldyń 9 maýsymynda ótkizý týraly sheshim qabyldadym.
Men bul jaýapty sheshim boiynsha Elbasymyz Nursultan Ábishuly Nazarbaevpen aqyldastym.
Parlamenttiń qos palata spikerimen, Premer-Ministrmen keńestim.
Konstitýtsiialyq Keńestiń kelisimine júgindim.
Parlamenttegi partiia jetekshilerimen kezdestim.
Kezekten tys sailaý týraly sheshim qabyldaý – óte mańyzdy ári qajetti qadam.
Biz Elbasymyzdyń arqasynda táýelsiz, qýatty memleket qurdyq. Qazaqstan halyqaralyq júiede ózine laiyqty ornyn aldy. Bizdi yqpaldy jáne beldi memleket retinde búkil álem moiyndaidy.
Qazirgi tańda tarihi kezeńdi bastan ótkerip otyrmyz.
Joǵary bilik zańdy jáne beibit jolmen aýysty. Búkil álem qoǵamdastyǵy osy oqiǵany túsinistikpen jáne qurmetpen qabyldady.
Memleket basshysy retinde men ózimniń mindetimdi jáne jaýapkershiligimdi tereń sezinemin.
Prezident laýazymyna kiriskennen bastap óńirlerdi aralap júrmin. Halyqtyń kóńil-kúiin jaqsy bilemin. Ziialy qaýymmen, eńbek ujymdarymen, biznes ókilderimen, investorlarmen, halyqaralyq tulǵalarmen kezdestim.
Biz Elbasynyń sara jolymen júremiz. Halqymyz – birtutas. Táýelsizdigimizdiń eń joǵary qundylyǵy retinde memleketimizdiń irgesi myǵym. Aldaǵy Prezident sailaýy osyǵan dálel bolýy kerek.
Sondyqtan, eldegi qoǵamdyq-saiasi kelisimdi qamtamasyz etip, alǵa basý úshin, áleýmettik-ekonomikalyq maqsat-mindetterdi laiyqty júzege asyrý úshin bizge aiqyndyq qajet. Onyń ústine, álemdegi ahýal bulyńǵyr bolyp tur. Bul Otanymyzdyń qaýipsizdigine syn-qater ákelýi múmkin.
Ishki jáne syrtqy saiasattaǵy sabaqtastyq pen turaqtylyqty saqtap, Elbasy usynǵan áleýmettik baǵdarlamalardy oidaǵydai sátti ári tiimdi iske asyrýymyz kerek.
Ol úshin atalǵan taǵdyrly sheshimdi qabyldadym.
Mundai sheshim tek halyqtyń tikelei erkimen sailaýda qabyldanýy qajet.
Qazaqstan – demokratiialyq memleket. Prezident halyqtyń tańdaýymen sailanady.
Men, Memleket basshysy retinde, sailaýdyń taza, ashyq ári ádil ótýine kepildik beremin! Bul – meniń berik ustanymym!
Aldymyzda zor mindetter tur. Men halqymyzǵa, iaǵni Sizderge senemin.
Qadirli Otandastar!
«Altaý ala bolsa, aýyzdaǵy ketedi, tórteý túgel bolsa, tóbedegi keledi» deidi dana halqymyz.
Aldaǵy sailaýǵa barshańyzdy barynsha jaýapkershilikpen qaraýǵa shaqyramyn.
Elimizdiń keleshegi, ár otbasy men ár azamattyń taǵdyry Sizderdiń sheshimderińizge tikelei bailanysty!
