Búgin Túrkistan oblysy aktivimen ótip jatqan jiyn barysynda Qasym-Jomart Toqaev Prezident laýazymyndaǵy maqsatyn jariia etti, dep habarlaidy QazAqparat tilshisi.
Jiyn barysynda Qazaqstan Prezidenti eń aldymen barsha jurtshylyqtyń Ulystyń uly kúni Naýryz meiramymen shyn júrekten quttyqtady.
«Biylǵy 19 naýryzda, kóktemniń shýaqty kúninde bárimiz elimizdegi tarihi oqiǵaǵa kýá boldyq. Memleket bolashaǵyn oilaǵan Tuńǵysh Prezidentimiz mańyzdy sheshim qabyldady. Osyndai syndarly kezeńde Elbasyny jáne meni qoldaǵan barsha halqyma rizashylyǵymdy bildiremin. Biz biliktiń aýysýyn turaqty jaǵdaida júzege asyramyz. Mundai jaǵdai Dúniejúzi tarihynda buryn bolmaǵan. Bul eń aldymen Elbasynyń parasattylyǵyn, keńdigin, sondai-aq halqymyzdyń danalyǵyn bildiredi. Biz álemge órkenietti el ekendigimizdi tanytyp, úlgi kórsettik. Osylaisha halqymyzdyń saiasi mádenietiniń joǵary ekendigin dáleldedik», - dep atap ótti Q.Toqaev.
Sonymen qatar Memleket basshysy bul bolashaq urpaq úshin de úlken úlgi-ónege ekendigin basa aitty.
«Meniń negizgi maqsatym - Elbasynyń strategiialyq baǵytynyń sabaqtastyǵyn qamtamasyz etý. Men osy isti jalǵastyra beremin. Elbasy bizge tabysty memleket quryp berdi. Ol Qazaqstandy álemdegi ozyq elderdiń qataryna qosa bildi. Elbasy reformalary memlekettik ornyqty damý jolyna shyǵardy», - dedi QR Prezidenti.
Q.Toqaev búginde búginde álemde básekelestik pen qatar jańa syn-qaterler ýshyǵyp turǵanyn, jalpy búkil dúniejúzi daǵdarysqa ushyraǵandyǵyn atap ótti. Álemniń bolashaǵy bulyńǵyr ekendigine nazar aýdartty.
«Sondyqtan toqtap qalýǵa múldem bolmaidy. Halqymyzdyń birligi, ultaralyq kelisim, kúshti ekonomika ári qarai alǵa basýymyzdyń negizi ári kepili», - dedi Memleket basshysy.
