Sýret: Aqorda
Qasym-Jomart Toqaev óziniń shaqyrýyn qabyl alyp, elimizge saparmen kelgeni úshin koreialyq áriptesine alǵys aitty. Sondai-aq muny eki el arasyndaǵy yntymaqtastyqty nyǵaitýǵa degen shynaiy niettiń aiqyn kórinisi dep baǵalaitynyn jetkizdi, dep habarlaidy "Ult aqparat" Aqordaǵa silteme jasap.
"Búgingi sapardyń qos tarap úshin de mán-mańyzy zor. Koreia Respýblikasy – biz úshin senimdi seriktes ári strategiialyq áriptes. Eki eldiń dostyq dástúrge negizdelgen qarym-qatynasy tereńnen tamyr tartady. Biz barlyq deńgeide tyǵyz bailanys ornattyq. Kún tártibindegi máseleler iskerlik rýhta jáne syndarly negizde sheshimin taýyp keledi. Qazirgi tańda eki el arasyndaǵy taýar ainalymynyń kólemi 6 milliard dollarǵa jetti. Bul – ortaq kúsh-jigerdiń jemisi. Aýqymdy ekonomikalyq jobalardy iske asyrdyq. Investitsiialyq yqpaldastyq jyldan-jylǵa nyǵaiyp keledi. Qazir Qazaqstanda Ońtústik Koreianyń kapitaly bar 700-den astam birlesken kásiporyn jumys isteidi. Mádeni-gýmanitarlyq bailanystarymyz qarqyndy damyp jatyr. Qazaqstandaǵy korei diasporasy bul úderiste mańyzdy ról atqarady. Ony eki halyqtyń arasyn jalǵap otyrǵan altyn kópir deýge bolady. Biz osy jetistikterdi eselep, qazaq-korei yntymaqtastyǵyn jańa deńgeige kóterýge múddelimiz. Bul sapar eki eldiń yntymaqtastyǵyna tyń serpin beretinine senimdimin", – dedi Qasym-Jomart Toqaev.
Iýn Sok Iol eki el arasyndaǵy strategiialyq seriktestiktiń 15 jyldyǵy qarsańynda Qazaqstanǵa saparmen kelgenine qýanyshty ekenin jetkizdi.
"Búginde elderimiz arasyndaǵy qarym-qatynas joǵary deńgeide damyp keledi. Kóptegen koreialyq kompaniia Qazaqstan ekonomikasyna investitsiia quiyp, jumys oryndarynyń ashylýyna jáne ónerkásiptiń órkendeýine yqpal etip otyr. Budan bólek, koreialyq investorlar Úlken Almaty ainalma avtomobil joly, bý-gaz elektr stantsiiasynyń qurylysy siiaqty iri jobalarǵa qatysyp, Qazaqstannyń ulttyq infraqurylymyn damytýǵa óz úlesterin qosyp keledi. Biz asa mańyzdy shikizattardy igerý, atom energetikasy, jańartylatyn energiia kózderi sekildi perspektivti baǵyttar boiynsha yntymaqtastyqty nyǵaitýǵa niettimiz. Jalpy, eki memlekettiń yqpaldastyq kókjiegin keńeitetin ýaqyt keldi. Osy sapar aldynda Úkimet Koreianyń Ortalyq Aziia elderimen yntymaqtastyǵy týraly K-Silk Road bastamasyn jariialady. Bul – Koreianyń Orta Aziiaǵa qatysty alǵashqy diplomatiialyq strategiiasy", – dedi Koreia Respýblikasynyń Prezidenti.
Kelissóz barysynda Qasym-Jomart Toqaev pen Iýn Sok Iol osydan úsh jyl buryn Qazaqstan Prezidentiniń Koreiaǵa sapary kezinde eki el arasyndaǵy qarym-qatynas keńeitilgen strategiialyq seriktestik deńgeiine kóterilgenin taǵy da rastady. Sondai-aq osy bailanystardy saiasi, saýda-ekonomikalyq jáne mádeni-gýmanitarlyq yntymaqtastyqtyń naqty baǵyttary boiynsha odan ári nyǵaita túsýge ózara niet bildirdi.
Prezidentter óńirlik jáne jahandyq kún tártibindegi máseleler jóninde jan-jaqty pikir almasty. Qasym-Jomart Toqaev Qazaqstan men Koreianyń halyqaralyq deńgeidegi kóptegen máselelerge qatysty ustanymy uqsas ekenin atap ótip, álemdegi geosaiasi qaishylyqtardyń sheshilýine eki el orta derjavalar retinde óz úlesterin qosa alatynyn málimdedi.
Aita keteiik, búgin Memleket basshysy Qasym-Jomart Toqaev Qazaqstanǵa úsh kúndik memlekettik saparmen kelgen Ońtústik Koreia Prezidenti Iýn Sok Ioldi qarsy aldy.
