Qazaqstan Respýblikasynyń Prezidenti Qasym-Jomart Toqaevtyń jáne Eýropalyq Keńestiń Prezidenti Sharl Misheldiń baspasózge arnalǵan birlesken málimdemesi jariialandy, dep habarlaidy "Ult aqparat" Aqordanyń resmi saityna silteme jasap.
2022 jylǵy 27 qazanda Qazaqstan Respýblikasy men Eýropalyq Odaq arasyndaǵy diplomatiialyq qatynastardyń ornaǵanyna 30 jyl tolýy qarsańynda Astana qalasynda Qazaqstannyń Prezidenti Qasym-Jomart Toqaev pen Eýropalyq Keńestiń Prezidenti Sharl Misheldiń kezdesýi ótti.
Prezident Qasym-Jomart Toqaev pen Prezident Sharl Mishel ashyq, dostyq jáne syndarly ahýalda ótken kelissózder barysynda sońǵy 30 jyl ishinde Qazaqstan Respýblikasy men Eýropalyq Odaq arasyndaǵy qarym-qatynastardyń joǵary deńgeii men serpindi damýyn rastady. Olar Qazaqstan men EO arasyndaǵy kópqyrly yntymaqtastyqty odan ári nyǵaitý, tereńdetý jáne keńeitý týraly ýaǵdalasty.
Taraptar ózderiniń BUU Jarǵysyna, halyqaralyq quqyqqa jáne egemendiktiń, táýelsizdik pen aýmaqtyq tutastyqtyń qaǵidattaryna berik beiildigin rastady. Prezidentter beibitshilik pen qaýipsizdikti saqtaýdyń, sondai-aq daýlardy diplomatiialyq jolmen sheshýdiń mańyzdylyǵyn basa aitty.
Qos kóshbasshy Qazaqstan men EO arasyndaǵy keńeitilgen áriptestik pen yntymaqtastyq týraly kelisimdi (KÁYK), EO-nyń Ortalyq Aziia jónindegi strategiiasyn, sondai-aq EO-nyń Ortalyq Aziia úshin ózara bailanys jáne basqa da sektorlary jónindegi jańa bastamalaryn odan ári jáne tolyq iske asyrý týraly ýaǵdalasty.
Qos prezident sońǵy 30 jyl ishindegi saiasi jáne saýda-ekonomikalyq yntymaqtastyqtyń joǵary serpinin quptady. Olar Eýropalyq Odaq Qazaqstannyń negizgi saýda jáne investitsiialyq áriptesi bolyp tabylatynyn qanaǵattanýshylyqpen atap ótti. Osyǵan orai, prezidentter «jasyl» ekonomika, energiianyń tiimdiligi, tsifrlandyrý jáne Qazaqstan men Eýropalyq Odaq arasyndaǵy ózara bailanys salalarynda qolda bar áleýetti paidalanýdyń mańyzdylyǵyn atap kórsetti.
Kezdesýde syni shikizat materialdary (SShM), ásirese jerde sirek kezdesetin metaldar salasyndaǵy yntymaqtastyq máseleleri de qozǵaldy. Taraptar SShM salasyndaǵy strategiialyq áriptestikti damytýǵa daiyn ekendikterin rastady jáne Qazaqstan Respýblikasy men Eýropalyq Odaq arasynda shikizat, akkýmýliatorlar jáne jasyl sýtegi qunynyń turaqty tizbegi salasyndaǵy strategiialyq áriptestik týraly ózara túsinistik jónindegi memorandýmǵa qol qoiýdy quptady. Osy turǵyda, olar iskerlik ahýaldy únemi jaqsartýdyń jáne Qazaqstanǵa EO investitsiialaryn odan ári tartýǵa qolaily jaǵdailardy qamtamasyz etýdiń mańyzdylyǵyn atap ótti.
Eýropalyq Odaq sanktsiialarynyń Qazaqstan ekonomikasyna abaisyz teris áserin boldyrmaý máselesine erekshe nazar aýdaryldy. Prezident Sh. Mishel EO sanktsiialary úshinshi elderge qarsy baǵyttalmaǵanyn rastady jáne halyqaralyq sanktsiialardan jaltarýǵa jáne olardy ainalyp ótýge jol bermeýdiń mańyzdylyǵyn atap kórsetti. Taraptar da sanktsiialarǵa jatpaityn taýarlardy óndiretin eýropalyq kompaniialardy Qazaqstanǵa kóshirý máselesin talqylady.
Qazirgi geosaiasi jaǵdaidy eskere otyryp, Prezident Q. Toqaev pen Prezident Sh. Mishel óndiris pen jetkizýdiń jahandyq tizbekterin qamtamasyz etý úshin Eýropa men Ortalyq Aziia arasyndaǵy qoldanystaǵy halyqaralyq kólik dálizderin keńeitýdiń jáne jańa dálizderdi damytýdyń mańyzdylyǵyn basa aitty. Olar sondai-aq Transkaspii halyqaralyq kólik baǵdarynyń áleýetin, ony odan ári damytý nusqalary men óńirdegi basqa kólik baǵdarlarynyń rólin talqylady.
Eki prezident klimattyń ózgerýi Qazaqstan men EO ózderiniń ekonomikalyq qyzmetin beiimdeýge tiis asa ózekti máselelerdiń biri bolyp tabylatynyn atap ótti. Jahandyq jylyný problemasy álemdik qaýymdastyqtyń kezek kúttirmeitin jáne tiimdi áreketterin talap etedi. Qos tarap ta óz ekonomikalaryn tómen kómirtekti damýǵa beiimdeý úshin saraptamalyq, tehnologiialyq jáne tehnikalyq yntymaqtastyqty nyǵaitýdyń mańyzdylyǵyn atap kórsetti. Olar sondai-aq sý resýrstaryn basqarý salasyndaǵy óńirlik yntymaqtastyqty odan ári qoldaý qajettigin basa aitty.
Eki kóshbasshy Qazaqstan men Eýropalyq Odaq arasyndaǵy adam quqyqtary men quqyq ústemdigi salasyndaǵy syndarly dialogty quptady. Qazaqstan osy salalardaǵy óziniń beiildigin rastady. Eýropalyq Keńestiń Prezidenti «Ádiletti Qazaqstannyń» saiasi jańǵyrýy men kózqarasyn ilgeriletýge baǵyttalǵan Qazaqstannyń mańyzdy reformalary baǵdarlamasyn, sondai-aq qańtar oqiǵalaryna tolyq jáne transparentti tergep-tekserý júrgizýge beiildigin quptady.
Prezident Q. Toqaev pen Prezident Sh. Mishel óńirlik jáne halyqaralyq kún tártibi, onyń ishinde Aýǵanstan máseleleri jóninde pikir almasty. Taraptar óńirdiń órkendeýiniń, ornyqtylyǵynyń jáne odan ári turaqty damýynyń kilti bolyp tabylatyn Ortalyq Aziiadaǵy óńirlik dialogty nyǵaitýdyń mańyzdylyǵyn atap ótti.
