Foto: Aqorda
Qazaqstan Prezidenti Qasym-Jomart Toqaev pen Chehiia Premer-ministri Andrei Babish keńeitilgen quramda kelissóz ótkizip, ekijaqty yntymaqtastyqty damytý máselelerin talqylady, dep habarlaidy Ult.kz.
Kezdesý barysynda Memleket basshysy Qazaqstan men Chehiia arasyndaǵy saiasi jáne ekonomikalyq bailanystardyń áleýeti joǵary ekenin atap ótti. Onyń aitýynsha, eki el Birikken Ulttar Uiymy, Eýropadaǵy qaýipsizdik jáne yntymaqtastyq uiymy aiasynda turaqty dialog júrgizip keledi.
Prezident Chehiiany Qazaqstannyń Eýropa Odaǵy ishindegi mańyzdy saýda seriktesteriniń biri retinde atap ótip, qazirgi tańda elimizde 190-nan astam cheh kompaniiasy jumys isteitinin jetkizdi. Olardyń qatarynda Škoda, Omnipol, Tatra jáne ZVVZ bar.
Óz kezeginde Andrei Babish Qazaqstandy strategiialyq seriktes retinde baǵalaitynyn aityp, ásirese energetika salasyndaǵy yntymaqtastyqty keńeitýge múddeli ekenin jetkizdi. Chehiia tarapy uzaq merzimdi munai jetkizilimine qyzyǵýshylyq tanytyp, atom energetikasyn damytýda Qazaqstanmen seriktestikti kúsheitýge nietti.
Kelissózder barysynda ónerkásip, munai-gaz, atom energiiasy, kólik-logistika, tsifrlandyrý, aýyl sharýashylyǵy jáne densaýlyq saqtaý salalaryndaǵy ózara is-qimyl perspektivalary qarastyryldy. Sonymen qatar mádeni-gýmanitarlyq bailanystar men tarihi ortaq jobalar da nazardan tys qalmady.
Prezident chehiialyq áriptesterge Prjevalskii jylqylaryn Qazaqstanǵa qaita jersindirý jobasyna qosqan úlesi úshin alǵys bildirdi. Al Chehiia Úkimetiniń basshysy Qazaqstan azamattaryna viza rejimin jeńildetý máselesin qarastyrýǵa daiyn ekenin aitty.
Kezdesý qorytyndysy boiynsha taraptar birlesken jobalardy júzege asyrý boiynsha naqty qadamdar ázirleýge kelisti. Sondai-aq Andrei Babish Qasym-Jomart Toqaevty Chehiiaǵa resmi saparmen kelýge shaqyryp, bul usynys qabyl alyndy.
Kelissózder sońynda Memleket basshysy Chehiia Premer-ministrin I dárejeli «Dostyq» ordenimen marapattap, onyń eki el arasyndaǵy strategiialyq seriktestikti nyǵaitýǵa qosqan úlesin joǵary baǵalady.
