Foto: Inbusiness.kz
Memleket basshysy Ortalyq Aziia memleketteri basshylarynyń VII konsýltativtik kezdesýinde OA biryńǵai týristik brendin ilgeriletýde pármendi sharalar qabyldaýdy jáne ortaq týristik keńistik qurýdy usyndy, dep habarlaidy Ult.kz.
Elderdiń kúsh-jigerdi biriktirýi halyqaralyq deńgeide tartymdylyqty kúsheitýge, básekege qabiletti transshekaralyq týristik ónimderdi damytýǵa jáne týrister qataryn arttyrýǵa múmkindik beredi.
Búgingi tańda Ortalyq Aziiada jalpy týristik aǵyn shamamen 30 million saiahatshyǵa jetedi. Aimaqtyń biregei áleýeti bar: Uly Jibek jolynyń ejelgi qalalary, tabiǵi alýan túrliligi, ózindik mádenieti jáne Dúniejúzilik mura nysandary.
Biryńǵai týristik keńistiktiń qurylýy saiahatshylar úshin jańa múmkindikter ashady. Onyń arqasynda bir sapar barysynda týrister birden birneshe eldiń tabiǵi landshafttary men mádeni bailyǵymen tanysa alady.
«Shet elderden keletin árbir ekinshi týrist kem degende eki eldi bir sapar barysynda aralaýǵa tyrysady. Eń tanymal format – Uly Jibek joly boiynsha biriktirilgen týrlar. Olardy aimaqtyń negizgi týristik ónimi retinde bekitilý usynylady. Prezident atap ótkendei, bul úshin týristik saiasatty tiimdi úilestirý qajet. Osy baǵytta alǵashqy qadamdar jasaldy», — dedi QR «Kazakh Tourism» UK» AQ Basqarma tóraǵasynyń m.a. Daniel Serjanuly.
Qazaqstan men Ózbekstan arasyndaǵy úsh halyqaralyq temirjol týry yntymaqtastyqtyń sátti úlgisine ainaldy. Uly Jibek jolynyń izimen ótetin transshekaralyq marshrýt aimaq elderinen ǵana emes, alys shetelderden de saiahatshylardyń nazaryn aýdardy.
