QR Parlamenti Senatynyń Tóraǵasy Qasym-Jomart Toqaev Elbasynyń dinge qatysty aitqan pikirin qoldap, Tvitterdegi paraqshasynda jazba qaldyrdy.
«Naǵyz islamshyldyq bul qara kiim, kelte shalbar, uzyn saqal emes, bul - imandylyq, bilimdilik, eńbekqorlyq, keńshilik. Elbasymyz óte durys aitty», - dep jazady Senat Tóraǵasy.
Eske sala keteiik, keshe QR Prezidenti Nursultan Nazarbaev Qazaqstan musylmandary dini basqarmasynyń ókilderimen kezdesken bolatyn. Onda Elbasy Qazaqstan halqynyń ómirinde dinniń erekshe ról atqaratynyn atap ótip, jas urpaqtyń dini saýatsyzdyǵyna airyqsha nazar aýdardy.
«Dini saýatsyzdyǵynyń nátijesinde jastarymyz saqal qoiyp, shalbarynyń balaqtaryn qysqartyp tastaidy. Qara kóilek kiip, beti-aýzyn tumshalaǵan qyzdarymyzdyń qatary kóbeidi. Bul bizdiń dástúrimizge de, halqymyzǵa da jat. Buǵan zańnamalyq deńgeide tyiym salý máselesin pysyqtaý kerek. Qazaq qara kiimdi qaraly kezde ǵana kiedi», - dedi Memleket basshysy.
Nursultan Nazarbaev qazaq mádenietiniń tarihyna, qazaq áielderiniń dástúrli kiimine toqtalyp, qara kiim men din arasynda eshqandai bailanys joq ekenin aitty.
