قر پارلامەنتٸ سەناتىنىڭ تٶراعاسى قاسىم-جومارت توقاەۆ ەلباسىنىڭ دٸنگە قاتىستى ايتقان پٸكٸرٸن قولداپ, تۆيتتەردەگٸ پاراقشاسىندا جازبا قالدىردى.
«ناعىز يسلامشىلدىق بۇل قارا كيٸم, كەلتە شالبار, ۇزىن ساقال ەمەس, بۇل - يماندىلىق, بٸلٸمدٸلٸك, ەڭبەكقورلىق, كەڭشٸلٸك. ەلباسىمىز ٶتە دۇرىس ايتتى», - دەپ جازادى سەنات تٶراعاسى.
ەسكە سالا كەتەيٸك, كەشە قر پرەزيدەنتٸ نۇرسۇلتان نازارباەۆ قازاقستان مۇسىلماندارى دٸني باسقارماسىنىڭ ٶكٸلدەرٸمەن كەزدەسكەن بولاتىن. وندا ەلباسى قازاقستان حالقىنىڭ ٶمٸرٸندە دٸننٸڭ ەرەكشە رٶل اتقاراتىنىن اتاپ ٶتٸپ, جاس ۇرپاقتىڭ دٸني ساۋاتسىزدىعىنا ايرىقشا نازار اۋداردى.
«دٸني ساۋاتسىزدىعىنىڭ نەتيجەسٸندە جاستارىمىز ساقال قويىپ, شالبارىنىڭ بالاقتارىن قىسقارتىپ تاستايدى. قارا كٶيلەك كيٸپ, بەتٸ-اۋزىن تۇمشالاعان قىزدارىمىزدىڭ قاتارى كٶبەيدٸ. بۇل بٸزدٸڭ دەستٷرٸمٸزگە دە, حالقىمىزعا دا جات. بۇعان زاڭنامالىق دەڭگەيدە تىيىم سالۋ مەسەلەسٸن پىسىقتاۋ كەرەك. قازاق قارا كيٸمدٸ قارالى كەزدە عانا كيەدٸ», - دەدٸ مەملەكەت باسشىسى.
نۇرسۇلتان نازارباەۆ قازاق مەدەنيەتٸنٸڭ تاريحىنا, قازاق ەيەلدەرٸنٸڭ دەستٷرلٸ كيٸمٸنە توقتالىپ, قارا كيٸم مەن دٸن اراسىندا ەشقانداي بايلانىس جوق ەكەنٸن ايتتى.
