Qazaqstan Respýblikasy Parlamenti Senatynyń Tóraǵasy Qasym-Jomart Toqaev Memleket basshysynyń tapsyrmasy boiynsha Miýnhen qaýipsizdik konferentsiiasyna qatysty, dep habarlaidy "Ult aqparat".
16-18 aqpanda ótken forýmǵa álemdik deńgeidegi saiasatkerler men qoǵam qairatkerleri qatysyp, halyqaralyq qaýipsizdiktiń mańyzdy máselelerin talqylady. Jekelegen sessiialar Eýropa Odaǵynyń Resei jáne AQSh-pen ózara is-qimylyna, Taiaý Shyǵys pen Korei túbegindegi shielenisterdi retteýge arnaldy. Kiberqaýipsizdik, energetika jáne azyq-túlik qaýipsizdiginiń ózekti máseleleri, Arktikadaǵy jaǵdai jóninde taqyryptyq dóńgelek ústelder boldy.
Konferentsiiada memleketter men úkimetterdiń basshylary, parlamentterdiń tóraǵalary men halyqaralyq uiymdardyń jetekshileri, yqpaldy qoǵam qairatkerleri men taldaý ortalyqtarynyń ókilderi sóz sóiledi. Sharaǵa barlyǵy 500-den astam adam qatysty.
Toqaev forým aiasynda birqatar kezdesý ótkizdi. Senat Tóraǵasynyń BUU Qorshaǵan orta jónindegi baǵdarlamasynyń Atqarýshy direktory Erik Solheimmen kezdesýinde Qazaqstannyń BUU qurylymdarymen ózara is-qimyl máseleleri talqylandy.
Toqaev Iadrolyq qarýdy joiý jónindegi halyqaralyq kampaniianyń (ICAN) atqarýshy direktory Beatris Findi uiymǵa Nobel beibitshilik syilyǵynyń tabys etilýimen quttyqtady. B.Fin Qazaqstannyń jappai qyryp-joiý qarýynan azat álem qurýdaǵy úlesin joǵary baǵalady, sondai-aq qarýsyzdandyrý salasyndaǵy halyqaralyq baǵdarlamany iske asyrýǵa ózara is-qimyl qajettigin atap ótti.
Schaeffler AG kontserni baiqaýshylar keńesiniń tóraǵasy Georg Shafflermen jáne Schaeffler AG-tyń Ortalyq jáne Shyǵys Eýropa, Taiaý Shyǵys jáne Afrika boiynsha atqarýshy bas direktory Rainer Lindnermen tehnologiialyq jáne investitsiialyq yntymaqtastyqtyń keleshegi týraly áńgime órbidi. Senat Tóraǵasy ekonomikany tehnologiialyq turǵyda jedel jańǵyrtý Qazaqstandaǵy keshendi reformanyń mańyzdy quramy ekenine nazar aýdara kelip, nemis biznesin bizdiń elimizdiń aýmaǵyndaǵy birqatar iri jobalardy iske asyrýǵa qatysýǵa shaqyrdy.
