Foto: Aqorda
Memleket basshysy Qasym-Jomart Toqaevtyń Konstitýtsiia kúnimen quttyqtady, dep habarlaidy Aqorda.
"Qurmetti otandastar! Barshańyzdy Konstitýtsiia kúnimen quttyqtaimyn!
Ata zań – memlekettiligimizdiń berik tuǵyry, elimizdiń dáiekti ári turaqty damýynyń myzǵymas kepili.
Memleket pen qoǵam ómiriniń negizin aiqyndaityn Konstitýtsiiada azamattardyń múddesine, quqyǵy men bostandyǵyna airyqsha nazar aýdarylǵan. Sondyqtan Qazaqstanda júzege asyrylyp jatqan barlyq aýqymdy ózgeristiń maqsaty – halyqtyń ál-aýqatyn jaqsartý.
2022 jylǵy konstitýtsiialyq reformanyń nátijesinde jan-jaqty demokratiialandyrý úderisi bastaldy, saiasi júieni jańǵyrtýǵa jaǵdai jasaldy. Quqyq qorǵaý institýttarynyń jáne Adam quqyqtary jónindegi ýákildiń mártebesi kóterildi. Sondai-aq Konstitýtsiialyq Sot quryldy. Bul mekeme qazir elimizde zań ústemdigin ornyqtyrýǵa barynsha yqpal etip otyr.
Konstitýtsiianyń ádil ári berekeli qoǵamnyń tiregi sanalatyn zań men tártipti qamtamasyz etý jolyndaǵy róli nyǵaia tústi.
Azamattardyń negizgi zańymyzdy qurmettep, onyń talaptaryn buljytpai oryndaýy – naǵyz otanshyldyqtyń jáne joǵary jaýapkershiliktiń aiqyn kórinisi. Biz Konstitýtsiiada bekitilgen qasterli qundylyqtarǵa súiene otyryp, barshaǵa birdei múmkindik beretin Ádiletti Qazaqstandy birge quratynymyzǵa kámil senemin.
Ár shańyraqqa baq-bereke, tolaiym tabys tileimin!" - delingen quttyqtaý sózinde.
