Memleket basshysy Qasym-Jomart Toqaev «Egemen Qazaqstan» jáne «Aiqyn» gazetine bergen suhbatynda qazaq tili máselesine qatysty suraqtarǵa jaýap berdi.
Suhbat barysynda Prezidentke memlekettik tildi damytý úshin qandai sharalar atqarylý kerektigi týraly suraq qoiylǵan bolatyn.
«Qazaqtyń tili - qazaqtyń jany! Halqymyzdyń tarihy da, taǵdyry da - tilinde. Mádenieti men ádebieti de, dili men dini de - tilinde. V.Radlov aitqandai, qazaq tili - eń taza ári bai tildiń biri. Til ótken tarihpen ǵana emes, búgin men bolashaqty bailanystyratyn qural. Menińshe, tildiń tuǵyry da, taǵdyry da besikten, otbasynan bastalady. Otbasynda ana tilinde sóilep ósken búldirshinniń tilge degen yqylasy tereń, qurmeti biik bolady. Osy turǵyda, balabaqshalarda, mektepterde memlekettik tildiń mártebesin kóterýdi nazarda ustaý qajet. Biz memlekettik tildiń mártebesin kóterý baǵytyndaǵy jumystardy úzdiksiz jalǵastyra beremiz», - dedi Qasym-Jomart Toqaev.
Budan bólek, suhbat barysynda latyn grafikasyna kóshýdiń aldaǵy qadamyna da nazar aýdaryldy. Bul rette Prezident kez kelgen ulttyń álipbi tańdaýy tek jazý úlgisin tańdaý emes ekenin atap ótti.
«Búginde Qazaqstan halqy da zamana kóshinen qalmai, latyn grafikasyna negizdelgen álipbidi tańdaýǵa bel býyp otyr. Kórshi memleketterdiń kópshiligi latyn grafikasyn tańdady. Álemdegi aqparattardyń 90 paiyzy latyn grafikasynda jaryq kóredi. Al aqparatqa kim ielik etse, ǵylym men tehnologiiaǵa da sol ie bolady. Qazaq tiliniń latyn álipbiine kóshýi - rýhani jańǵyrýdyń eń sheshýshi kezeńderiniń biri. Bul qoǵamdyq oi men sanaǵa túpkilikti ózgeris jasaityn qadam», - dedi Memleket basshysy.
Prezidenttiń aitýynsha, latyn álipbiine kóshý kezeń-kezeńimen jalǵasa beredi. «Naqty belgilengen keste bar. Sol júieden aýytqymaimyz. Biraq, qoǵamdyq pikir, álipbidi qoldaný barysyndaǵy artyqshylyqtar men olqylyqtar eskeriledi», - dedi Qasym-Jomart Toqaev.
