Foto: Aqorda
Qazaqstan Prezidenti Qasym-Jomart Toqaev Qasr Al Shatie saraiynda Birikken Arab Ámirlikteriniń Prezidenti sheih Muhammed ben Zaid Ál Nahaianmen kezdesti dep habarlaidy Ult.kz.
Memleket basshysy kórsetken syi-qurmeti men qonaqjailyǵy úshin BAÁ Prezidentine rizashylyǵyn jetkizip, «Abý Dabidiń ornyqty damý aptalyǵynyń» sátti ótýine tilektestik bildirdi.
Qasym-Jomart Toqaev 2023 jyly sheih Muhammed ben Zaid Ál Nahaianmen Abý Dabide jáne Dýbaida ótken kezdesýlerdi yqylaspen eske alyp, kelissózder nátijesi ekijaqty qatynastarǵa tyń serpin bergenine ári yqpaldastyqtyń jańa baǵyttaryna jol ashqanyna nazar aýdardy.
"BAÁ – bizdiń arab álemindegi basty seriktesimiz. Elderimizdiń igiligi úshin ekijaqty jáne kópjaqty bailanystardyń barlyq baǵyty boiynsha tyǵyz yntymaqtastyq qurýǵa niettimiz. Men dostyq, ózara senim men qurmetke negizdelgen strategiialyq seriktestigimizdi nyǵaitýǵa Sizdiń qosqan úlesińizdi joǵary baǵalaimyn. Asa Mártebeli Prezident myrza, Sizdi óz elimde qushaq jaia qarsy alýǵa daiynmyn. Qazaqstanǵa jasaityn saparyńyz ekijaqty yntymaqtastyqty nyǵaitýdyń jańa kezeńine bastaý bolatynyna senimdimin", – dedi Memleket basshysy.
Prezident búginde BAÁ elimizdiń ekonomikasyna qarjy quiǵan on iri sheteldik investordyń qataryna kiretinin atap ótti.
"Byltyr BAÁ-den kelgen tikelei investitsiia kólemi eki esege ulǵaidy. Abý Dabidegi kezdesý barysynda biz taýar ainalymyn 1 milliard dollarǵa jetkizemiz dep maqsat qoidyq. Eki el úkimetteri saýda-sattyqtyń oń qarqynyn qalyptastyrý úshin naqty ekonomikalyq kún tártibine mán bergeni jón. Strategiialyq investitsiialyq jobalardy qurý týraly birlesken deklaratsiiany júzege asyrýǵa Sizdiń tarapyńyzdan qoldaý kórsetiledi dep senemiz. Bul qujat aiasynda Ámirlikterdiń kompaniialarymen kólik-logistika, energetika, qarjy, týrizm jáne basqa da kóptegen salada belsendi yntymaqtastyq júrgizip kelemiz. Bul seriktestik elderimizdiń ósip-órkendeýine septigin tigizedi", – dedi Qasym-Jomart Toqaev.
