Memleket basshysy Qasym-Jomart Toqaev Venadaǵy terrorlyq aktige bailanysty Avstriia Prezidenti Aleksandr Van der Bellenge kóńil aitý jedelhatyn joldady, dep habarlaidy "Ult aqparat" Aqordaǵa silteme jasap.
«Búkil avstriialyqtar siiaqty barlyq dinge kereǵar keletin, adami senim men aqylǵa syimaityn mundai jantúrshigerlik zorlyq áreketke qarsymyn. Terrorizmniń kez kelgen túrine jol berýge jáne ony aqtaýǵa bolmaidy. Osyndai qanypezer zulymdyqqa barǵan barlyq kináliler jaýapqa tartylady dep úmittenemin. Qazaqstan halqynyń jáne óz atymnan qaza bolǵandardyń otbasylaryna qaiǵyryp kóńil aitamyn, zardap shekken azamattardyń tezirek saýyǵyp ketýine tilektespin. Osynaý qaraly kúnderi Avstriianyń Federaldyq Úkimetimen jáne halqymen birgemiz», – delingen jedelhatta.
Eske salaiyq, 2 qarasha kúni Aýstriia astanasy Venanyń ártúrli aýmaǵynda lańkestik shabýyldar jasaldy. Qaskóilerdiń birin politsiia atyp óltirdi, endi sybailastaryn izdestirýde.
Politsiia málimetinshe, shabýyl alty jerde, sonyń ishinde qala ortalyǵyndaǵy sinagogaǵa jaqyn aýmaqta, evrei ortalyǵy men meiramhana janynda boldy.
Qazaqstannyń Aýstriiadaǵy elshiliginiń aldyn ala aqparatyna sáikes, qaza tapqandar men jaraqattanǵandar arasynda QR azamattary joq.
