Ana men balany qorǵaý, onkologiialyq, kardiologiialyq, pýlmonologiialyq jáne meditsinalyq kómektiń basqa da túrlerin kórsetý – el aldyndaǵy mindetimiz. Bul týraly koronavirýs indetiniń ekinshi kezeńine daiyndyq máseleleri boiynsha keńeste Memleket basshysy Qasym-Jomart Toqaev aitty, dep habarlaidy "Ult aqparat".
«Úkimet meditsinalyq kómektiń ózge túrlerin de kórsetýdi umytpaýǵa tiis. Ana men bala densaýlyǵyn qorǵaý – negizgi basymdyqtyń biri. Ókinishke qarai, ana ólimi kórsetkishi barlyq óńirde birneshe ese kóbeiip ketti. Byltyrǵy 8 aida – 36 áiel qaitys bolsa, biylǵy 8 aida – 131 áiel qaitys bolypty. Mysaly, Aqtóbe oblysynda bul kórsetkish shamamen 13 ese, Qyzylorda oblysynda 9 ese, Shymkent qalasynda 7 ese artty. Nege bul adamdarǵa kómek kórsetilmedi? Qandai sharalar qabyldanyp jatyr? Bul óte ózekti suraqtar. Olarǵa ákimder jaýap berý kerek», - dedi Memleket basshysy.
Qazaqstan Prezidenti Úkimetke óńirlermen birlesip, atalǵan faktilerdiń árqaisysyn tekserip, nátijesin baiandaýdy tapsyrdy.
«Ana men balany qorǵaý, onkologiialyq, kardiologiialyq, pýlmonologiialyq jáne meditsinalyq kómektiń basqa da túrlerin kórsetý – el aldyndaǵy mindetimiz. Ákimderdi, jalpy Úkimetti bul mindetten eshkim bosatqan joq. Prezident Ákimshiligine osy máseleni baqylaýǵa alýdy tapsyramyn», - dedi Qasym-Jomart Toqaev.
