Memleket basshysy Qasym-Jomart Toqaev Nur-Sultan qalasynyń ákimi Altai Kólginovten gazdandyrý máselesi qalai júrgizilip jatqanyn surady, dep habarlaidy QazAqparat.
«Elordany damytýdaǵy jalpy amal-ádisterdiń baǵyt-baǵdary durys dep esepteimin. Álbette, qurylys jumystaryna basa mán bergen abzal. Úi qurylysy bolsyn, mektepter men azamattarǵa qatysty infraqurylym jaily da aitarym sol. Sebebi elorda óz elimizdegi halyqqa da, syrttan keletin azamattarǵa da tartymdy qala bolýy kerek. Investitsiialardyń mańyzy zor, sol sebepti bul máselege basa nazar aýdaryp otyrǵandaryńyz durys. Men injenerlik infraqurylymdy salý jaǵynan Úkimet pen qala ákimdiginiń jumysyn qoldaimyn. Biz buǵan deiin elordanyń ózin sala berdik te, astyndaǵy infraqurylymyn umyt qaldyrǵanbyz. Al injenerlik, kommýnaldyq infraqurylymsyz qala kúnderdiń kúni «tunshyǵyp», bir kúni úlken máselemen betpe-bet kelýimiz múmkin», - dedi Memleket basshysy Úkimettiń keńeitilgen otyrysynda.
Qasym-Jomart Toqaev sonymen qatar qalany gazdandyrý máselesine jeke toqtaldy.
«Elordany gazdandyrý jumysyn Elbasy Nursultan Ábishuly Nazarbaevtyń ózi tikelei tapsyrǵan edi. Qazir biraq azamattardyń úilerin gazǵa qosý qarqynyn saqtaý kerek. Jeke úilerdiń gazǵa qosylýy jaǵynan másele baryn estip jatyrmyz. Sebebi olar úshin gazǵa qosylý baǵasy jylyna 500-700 myń teńgege deiin barady eken. Bul óte qymbat soma sekildi. Bul máseleni qalai sheshesizder?» - dep surady Prezident ákimnen.
Bul suraqqa jaýap bergen Nur-Sultan qalasynyń ákimi turǵyndar tarapynan gazdyń baǵasyna degen kelispeýshiligi bolǵanyn moiyndady.
«Biz merdigerlerden baǵany tómendetýdi suradyq. Máselen merdigerler buryn gazǵa qosý úshin ǵana 240 myń teńge suraityn. Qazir bul qyzmetti 150 myń teńgege deiin azaittyq (bul somaǵa gaz qurylǵysy men qosalqy bólshekter quny kirmeidi - avt.). Olar kelisti. Turǵyndar oǵan qýanyp jatyr. Gazdandyrý qarqynyn azaitpaimyz. Bári josparda», - dedi ol.
