Foto: Aqorda
Memleket basshysy Qasym-Jomart Toqaev Alem.ai halyqaralyq jasandy intellekt ortalyǵyn aralap kórdi. Ortalyqta JI salasyndaǵy ǵylymi zertteýler júrgizilip, bilim berý baǵdarlamalary júzege asyrylady, sondai-aq startaptar men qoldanbaly sheshimderdi damytýǵa múmkindik jasalǵan, dep habarlaidy Ult.kz.
Prezidentke tanystyrylǵan jobalar jasandy intellekt tehnologiialaryn memlekettik sektorda, bizneste jáne kúndelikti ómirde qoldanýǵa baǵyttalǵan. Bul bastamalar Qazaqstandy tehnologiialyq ári básekege qabiletti elge ainaldyrýǵa negizdelgen.
Sapar barysynda Memleket basshysy Astana Smart City jobasynyń iske qosylýyna kýá boldy. Joba qala infraqurylymyn intellektýaldy júiege kóshirýge múmkindik beredi. Presight.AI kompaniiasynyń bas direktory Tomas Pramotedham biryńǵai AI-platformanyń jumysyn tanystyryp, onyń qalany tiimdi basqarýdaǵy múmkindikterin kórsetti.
Foto: Aqorda
Sonymen qatar Prezident birqatar bilim berý bastamalarynyń iske qosylý rásimine qatysty. Onyń tapsyrmasymen qurylǵan Tomorrow School jasandy intellekt mektebiniń tájiribesi endi búkil el boiynsha engizilmek. Telekópir arqyly 14 óńirde osy mektepterdiń jelisi ashyldy.
Atalǵan mektepterde kámelet jasynan asqan azamattar, sonyń ishinde IT salasyna jańadan qadam basqandar tegin bilim ala alady.
Foto: Aqorda
Budan bólek, Astanada 12-18 jas aralyǵyndaǵy balalar men jasóspirimderge arnalǵan TUMO kreativti tehnologiialar ortalyǵy jumys isteidi. Munda jasandy intellekt, baǵdarlamalaý, oiyn jasaý, animatsiia, 3D-modeldeý, robototehnika jáne tsifrlyq mýzyka sekildi baǵyttar boiynsha bilim beriledi.
Prezidentke sondai-aq Alem.ai bazasynda qurylatyn AI Research University tujyrymdamasy tanystyryldy. Ǵylym jáne joǵary bilim ministri Saiasat Nurbektiń aitýynsha, oqý úderisi biyl 1 qyrkúiekte bastalady.
Sapar sońynda Qasym-Jomart Toqaev «Bolashaq oiyndary-2026» halyqaralyq týrnirine deiingi keri sanaqty iske qosty. Atalǵan jarys Astanada 29 shilde men 9 tamyz aralyǵynda ótedi.
