Foto: Aqorda
Aqordada elimizge resmi saparmen kelgen Itshak Gertsogty saltanatty qarsy alý rásimi ótti, dep habarlaidy Ult.kz.
Rásim barysynda memleket basshylary bir-birine delegatsiia múshelerin tanystyryp, Qurmet qaraýylynyń bastyǵy raport berdi. Odan keiin Qazaqstan men Izraildiń memlekettik ánurandary oryndaldy.
Kelissózder shaǵyn quramda Qasym-Jomart Toqaev pen Itshak Gertsogtyń qatysýymen ótti. Qazaqstan Prezidenti mártebeli meimandy elimizdiń tórinde qarsy alýǵa qýanyshty ekenin aityp, eki el arasyndaǵy qarym-qatynastyń qalyptasýyna Izraildiń burynǵy Prezidenti Haim Gertsogtyń zor úles qosqanyn atap ótti.
– 1992 jyldan beri qos halyq arasynda tyǵyz dostyq bailanys ornady. Ekonomikalyq jáne saiasi baǵyttarda eleýli nátijelerge qol jetkizdik. Qazaqstan Ibrahim kelisimderine qosylý týraly sheshim qabyldady. Bul qadam Taiaý Shyǵystaǵy turaqtylyqty nyǵaitýǵa úles qosýǵa daiyn ekenimizdi bildiredi. Búgin ózara ekonomikalyq bailanystardy damytý máselelerin jan-jaqty talqylaimyz, – dedi Memleket basshysy.
Óz kezeginde Itshak Gertsog Qazaqstanǵa sapary ákesiniń jolyn jalǵastyrý ekenin atap ótip, qazaq jerine kelýdi kópten beri armandaǵanyn jetkizdi.
– Qazaqstannyń tabiǵaty men mádenieti týraly kóp estidim. Bul saparǵa joǵary tehnologiialar salasyndaǵy yntymaqtastyqty damytýǵa yqpal etetin sarapshylarmen birge keldim. Qazirgi jahandyq ózgerister kezeńinde elderimiz arasyndaǵy áriptestiktiń áleýeti óte joǵary, – dedi Izrail Prezidenti.
Kelissózder keiin keńeitilgen quramda jalǵasty. Taraptar saiasi dialogtyń qarqyndy damyp kele jatqanyn, saýda-ekonomikalyq jáne investitsiialyq yntymaqtastyqta naqty jetistikter bar ekenin atap ótti.
Memleket basshysy Ibrahim kelisimderiniń óńirlik turaqtylyqty nyǵaitýǵa jáne ekonomikalyq bailanystardy keńeitýge múmkindik beretinin aitty. Sonymen qatar Qazaqstan jasandy intellekt pen tsifrlandyrý salalaryndaǵy seriktestikti damytýǵa múddeli ekenin jetkizdi.
Itshak Gertsog Qazaqstannyń konfessiiaaralyq kelisim men toleranttylyq úlgisin joǵary baǵalap, ekijaqty saýda kólemin arttyrýǵa jáne tikelei áýe qatynasyn ashýǵa qyzyǵýshylyq bildirdi. Sondai-aq qosarlanǵan salyqty boldyrmaý týraly kelisimdi qosa alǵanda, quqyqtyq bazany keńeitý josparlanyp otyrǵanyn aitty.
Kelissóz qorytyndysy boiynsha taraptar saiasi dialogty jalǵastyryp, barlyq deńgeidegi yqpaldastyqty jandandyrýǵa jáne seriktestikti jańa sapaly kezeńge kóterýge ýaǵdalasty.
