Biyl Abai Qunanbaiulynyń týǵanyna 175 jyl tolady. Halqymyzdyń uly perzentiniń mereitoiyn laiyqty atap ótý úshin arnaiy qurylǵan komissiia daiyndyq jumystaryn bastap ketti.
Bul týraly óziniń «Abai jáne HHI ǵasyrdaǵy Qazaqstan» atty maqalasynda Qazaqstan Prezidenti Qasym-Jomart Toqaev jazdy, dep habarlaidy "Ult aqparat".
Maqalada Prezident uly Abaidyń 175 jyldyǵy aiasynda memleket kóleminde jáne halyqaralyq deńgeide aýqymdy is-sharalar uiymdastyrý josparlanyp otyrǵandyǵyn atap ótti.
«Biraq munyń bári toi toilaý úshin emes, oi-órisimizdi keńeitip, rýhani turǵydan damýymyz úshin ótkizilmek. Abai Qunanbaiuly ǵulama, oishyl, aqyn, aǵartýshy, ulttyń jańa ádebietiniń negizin qalaýshy, aýdarmashy, kompozitor retinde el tarihynda óshpes iz qaldyrǵany sózsiz. Onyń óleńderi men qara sózderinde ult bolmysy, bitimi, turmysy, tirshiligi, dúnietanymy, minezi, jany, dini, dili, tili, rýhy kórinis taýyp, keiin Abai álemi degen biregei qubylys retinde baǵalandy. Ótken jyly Abaidyń shyǵarmalarynan úzindi oqý estafetasy ótti. Láilim atty oqýshy qyz usynǵan bul eldik sharaǵa men de qatysyp, qoldaý kórsettim. Mektep oqýshylarynan el azamattaryna, tipti, álemdik deńgeidegi tanymal tulǵalarǵa deiin zor qyzyǵýshylyq tanytyp, lezde ilip áketken bul bastama birneshe aiǵa ulasty», - dep jazdy Qasym-Jomart Toqaev.
Sonyń arqasynda búkil Qazaqstan Abai murasyn taǵy bir zerdelep shyqty.
«Bul – Abaiǵa degen qurmet ári urpaqty tárbieleýdiń tiimdi tásili. Abai jyrlaryn oqý chellendji biyl, aqyn mereitoiy tusynda jańasha jandanady dep senemin», - dep jazady Memleket basshysy.
