Kaspii teńizinen qutqarylǵan Túrkiia azamaty eline jiberildi. Bul jaiynda oblystyq densaýlyq saqtaý basqarmasy málim etti, dep habarlaidy "Ult aqparat".
Eske sala keteiik, Túrkiia azamaty 2020 jyldyń 31 jeltoqsanynda Jańaózen qalalyq kópbeiindi aýrýhanasyna aýyr jaǵdaida túsken bolatyn. Jedel túrde hirýrgiialyq emdeý sharasy júrgizildi.
Túrik tarapynyń 2021 jylǵy 5 qańtardaǵy sheshimine sáikes, naýqasty túrik sanaviatsiiasy arqyly eline aýystyrý týraly sheshim qabyldandy.
Naýqas aldymen Aqtaý qalasyna Jańaózennen jetkizildi. Sóitip Aqtaý halyqaralyq áýejaiy arqyly óz otanyna ushyp ketti. Ol Túrkiianyń soltústik-shyǵysyndaǵy Erzýrým qalasyna aman-esen jetti.
Aita ketý kerek, 50 jastaǵy Túrkiia azamaty halyqaralyq kólik kompaniiasynda júk kóliginiń júrgizýshisi bolyp jumys isteidi.
Búgin Jańaózen qalalyq kópbeiindi aýrýhanasy ujymyna Túrkiia Respýblikasynyń Aqtaý qalasyndaǵy Bas Konsýly Mýzaffer Akiyldyrymnyń atynan naýqasqa shuǵyl túrde meditsinalyq kómek kórsetilgeni jáne sátti ota jasalǵany úshin Alǵys hat jiberildi.
Esterińizge sala keteiik, buǵan deiin «Sarbaz» shekara kemesiniń ekipajy kúrdeli aýa raiy jaǵdaiynda «Akademik Hasan Aliev» paromynan Túrkiia azamatyn qutqarý operatsiiasyn ótkizgeni habarlanǵan bolatyn.
Meditsinalyq kómekke muqtaj er adam Kendirli shyǵanaǵy jaǵalaýyna shyǵarylyp, Jańaózen qalasyndaǵy aýrýhanaǵa jatqyzylǵan edi.
