Mańǵystaý oblysynda jas jigit úsh táýlik boiy ashyq teńizde bolǵan, dep habarlaidy "Aqtaý-Lada" basylymy.
24 jastaǵy Abylai Súleimenovtiń aitýynsha, maýsymnyń 18-nen 19-na qaraǵan túni ol dosymen birge Aqtaýdan jiyrma shaqyrym jerde ornalasqan Aqshúkir kentiniń aýmaǵynda sýǵa shomylmaq bolǵan. Avtokólik dóńgeleginiń qabymen júzgen ony aǵys teńiz ishine alyp ketken.
Jas jigit mańynda ótken kemeler men tikushaqtar kórgenin, aiǵailap daýys bergenin, biraq ony eshkim estimgenin aitady. Sondai sátterdiń birinde ol alystan munartqan kemeni baiqap, bar kúshimen soǵan qarai júzip barady. Keme Iranǵa tiesili bolyp shyqty. Teńizshiler Abylaidy sýdan shyǵaryp, tamaqtandyryp, qurǵaq kiim bergen. Sosyn ózderiniń qazaqstandyq áriptesterimen bailanysqa shyqqan. Bir saǵatqa jetpei ony dárigerler alyp ketken.
Dárigerler Abylaidyń jaǵdaiyn ortasha dárejeli dep baǵalap, dene temperatýrasynyń 32 gradýsqa tómendegenin habarlaidy. Kelesi aptada ony úiine shyǵarady.
