Kaspii qubyr konsortsiýmy (KQK) kompaniianyń jumysyn toqtatý týraly Novorossiisk sotynyń sheshimin oryndaýdy 30 kúnge tejeý týraly ótinish bergenin, óitkeni mundai áreket óndiriske aýyr saldar men zardaptar ákelýi múmkin ekenin aitty, dep habarlaidy Sputnik Qazaqstan.
6 shildede Kaspii qubyr konsortsiýmy ekologiialyq zań buzýshylyqtar anyqtalǵannan keiin Novorossiisk soty kompaniianyń jumysyn 30 kúnge toqtatý týraly sheshim qabyldaǵanyn jáne kompaniia bul sheshimge qarsy shaǵymdanatynyn habarlady.
"KQK-R" AQ Novorossiisk qalasynyń Primorsk aýdandyq sotyna 5-1188/2022 isi boiynsha "KQK-R" AQ qyzmetin ákimshilik negizde ýaqytsha toqtatý týraly sýdianyń 2022 jylǵy 5 shildedegi qaýlysyn oryndaýdy toqtata turý týraly talaparyz joldady", - dep habarlady kompaniiadaǵylar.
Kompaniia qaýlyǵa qatysty shaǵymdy qaraý nátijesi boiynsha shyǵarylatyn sot aktisi zańdy kúshine engenge deiin ýaqyt berýdi suraǵan.
KQK pikirinshe, kompaniianyń jumysyn kúrt toqtatý "óndiris protsesi úshin rettelmeitin saldarǵa, tehnikalyq nysanda qolaisyz jáne basqarylmaityn protsestiń týyndaýyna jáne órshýine, onyń ishinde onyń buzylýyna" ákelýi múmkin. Sebebi munaidy tasymaldaýǵa qoiylatyn talaptar aiaq asty jáne bir ýaqytta toqtatýǵa múmkindik bermeidi.
Sonymen qatar zań óndiris protsesi úshin qaitymsyz zardaptarǵa ákelýi múmkin sharalardy qoldanýǵa jol bermeidi.
"Jumysty kúrt toqtatqan jaǵdaida atalǵan keleńsiz saldardyń týyndaý yqtimaldylyǵy "KQK-R" AQ-ǵa sýdianyń qaýlysyn oryndaýdy toqtata turý týraly talaparyz usynýǵa múmkindik beredi", - dep túsindirdi konsortsiýmdegiler.
Eske salsaq, Novorossiiskiniń Primorskii aýdandyq soty Rostransnadzor anyqtaǵan zańbuzýshylyqtardy joiý úshin Kaspii qubyr konsortsiýmynyń (KQK) qyzmetin 30 kúnge toqtatqan bolatyn.
Rostransnadzordyń Ońtústik ÝGRN-y Primorskii aýdandyq sotyna konsortsiým qyzmetin 90 kúnge toqtata turý týraly ótinishpen júgingen. Sot Rostransnadzordyń talaptaryn ishinara qanaǵattandyrdy. "KQK-R" AQ qyzmetin 30 táýlikke ákimshilik toqtata turý túrinde jaza taǵaiyndaldy.
Kaspii qubyr konsortsiýmy "sot sheshimin oryndaýǵa májbúr", alaida onyń ústinen shaǵym túsirýge nietti. Konsortsiýmnyń baspasóz qyzmeti ýaqytsha toqtatý merzimine qatysty túsinikteme berýden bas tartty.
KQK – qazaqstandyq munai úshin negizgi eksporttyq baǵyt, oǵan qubyr arqyly aidalatyn kólemniń 80%-ten astamy tiesili. Qubyr jelisiniń qýattylyǵy – jylyna 67 million tonna munai.
