© Photo : KTK
Kaspii qubyr konsortsiýmy osy aida tolyq jumys istei bastaidy. Bul týraly energetika ministri Bolat Aqsholaqov málimdedi, dep habarlaidy Sputnik Qazaqstan.
Ministr qazir Kaspii qubyr konsortsiýmynda jeke ornatylǵan 3 ailaq qurylǵysynyń bireýi ǵana jumys isteitinin atap ótti.
"Qashaǵandaǵy jóndeý jumystaryna bailanysty Kaspii qubyr konsortsiýmynyń jeke ornatylǵan bir ailaq qurylǵysynyń jumysy qazirgi kólemder úshin jetkilikti. Kaspii qubyr konsortsiýmy biyl qazan aiynda tolyq jumys istei bastaidy dep kútilýde", - dedi Aqsholaqov Úkimet otyrysynda.
Qańtar-qyrkúiekte munai jáne kondensat óndirý kólemi 61,9 mln tonna boldy. Máselen, Teńiz ken ornynda atalǵan kezeńde 21,5 mln tonna munai óndirilse, Qarashyǵanaq ken ornynda munai óndirý kórsetkishi 8,5 mln tonnaǵa jetti. Al Qashaǵanda munai óndirý kólemi 8,7 mln tonnany nemese osy jyldyń josparyna 83%-ti qurady.
"Bul kórsetkishtiń tómendeýi "Bolashaq" zaýytyndaǵy gaz bólý qondyrǵysynyń biyl tamyz aiynda isten shyǵýyna bailanysty boldy. Operator óndirý deńgeiin tez qalpyna keltirý boiynsha jóndeý jumystaryn júrgizip jatyr. Búginde ken orny óz qýatynyń jartysyna ǵana jumys isteidi",- dep túsindirdi ministr.
Aitýynsha, osy jyldyń 9 aiynda munai eksporty 46,8 mln tonnany nemese 2021 jylǵy sáikes kezeńmen salystyrǵanda 96%-ti qurady.
