QR Kásipodaq federatsiiasynyń tóraǵasy Satybaldy Dáýletalin Eńbek jáne halyqty áleýmettik qorǵaý ministrliginiń keńeitilgen alqa májilisinde kásiporyndardyń eńbek ónimdiligin arttyrýǵa múddelý bolmaý sebebin atady, dep habarlaidy QazAqparat.
«Bizdiń zańnamada eńbek quqyǵyn qamtamasyz etýge qajetti quqyqtyq arsenaldar jetkilikti. Biraq is júzinde eńbek quqyǵynyń belgilengen kepildikteri men olardy iske asyrý múmkindikteriniń arasynda alshaqtyq bar ekenin kórip júrmiz. Oǵan jyl saiyn kásipodaq uiymdaryna eńbek quqyqtarynyń buzylǵany týraly jumysshylardan kelip jatatyn aryz-shaǵymdar kýá. Elimizde jaldamaly jumysshylardyń eńbek quqyqtaryn saqtaý men qorǵaýdyń kóptegen syn-tegeýrinderi bar», - dedi federatsiia basshysy.
Onyń baiqaýynsha, jumys berýshiler jaldamaly eńbekke ketetin shyǵyndy únemdeý úshin eńbek zańnamasyndaǵy normalardan jii aýytqityn kórinedi.
«Eńbekaqynyń stagnatsiiasy men eńbek tabysynyń tómendeýi halyqtyń erteńgi kúnge degen senimin azaityp jatyr. Óitkeni kúrdeli ekonomikalyq jaǵdailarda jumys berýshilerdiń kóbi eńbek salasyndaǵy ózgeristerge daiyn bolmai shyqty. Jumys berýshiler jaldamaly eńbekke ketetin shyǵyndy únemdeý úshin eńbek zańnamasyndaǵy normalardan jii aýytqidy. Keide bul quqyq salasyndaǵy biliksizdikten de týyndap jatady. Qalai bolǵanda da bul jumysshylardyń múddesine ziian keltiredi. Jumysshylar eńbek qatynasyndaǵy barynsha az qorǵalǵan tarap bolyp otyr.
Kompaniialar biznesin damytý úshin tenologiialardy aýystyrý arqyly eńbek ónimdiligin arttyrýdyń ornyna arzan eńbekke arqa súieýge beiim. Qarapaiym tilmen aitqanda, jańa qondyrǵylar alyp, qomaqty kapital salǵysy kelmeidi. Odan da arzan jumys kúshin paidalanýdy durys dep sanaidy», - dedi Satybaldy Dáýletalin.
